RENUNGAN HARIAN

RENUNGAN HARIAN BAHASA TOBA :

Senin 8 Juni 2009
2Kor 1:1-7; Mat 5:1-12

“Martua ma parroha na ias, ai idaonasida do Debata!”

Nuaeng on, di ari Minggu borngin, di tipi adong do acara Golden Ways. On nuaeng acara faforit. Molo nunga tingki acara i, tung mansai torop jolma hundul di jolo ni tipi laho mambegei aha nanidok ni si Mario Teguh. Songon i muse na dohot di acara langsung i stasiun tipi i. Pasti sude na manonton acara i suang songon i sude jolma manghirim di ngolu na marlas ni roha. Marhite na manonton acara i jala manangihon hata ni si Mario Teguh, harap roha na mandapot parsiajaran boha do laho patupahon asa marlas ni roha ibana.
Alai asing muse molo taida di Gareja manang di tingki Ibadat. Di tingki panjahaon, tarlumobi di tingki jamita, ndang piga ruas i na manangihon, gariada olo do laho tu luar gareja, marisap, ndung pe tingki komuni masuk muse. Hape sasintongna, molo tutu taparrohahon, aha nadidok di acara i, ndang sadia dope i molo dibandinghon dohot aha naung tarsurat di Bible tarlumobi naung diajarhon Jesus tu hita. Molo manghirim hita asa marlas niroha hita di ngolu nuaeng on, tarlumobi di ngolu na manontong, tajaha, tahaporseai jala taparngoluhon ma angka hata ni Debata, angka parsiajaran naung dilehon ni Jesus tu hita. Rupani i, sadari on diajari Jesus do hita boha do asa marlas niroha hita di ngolunta on. Di bagasan hataNa sadari on didok piga-piga na boi mambahen hita marlas ni roha, rupani i: tongtong marunduk ni roha di jolo ni Debata dohot dongan, ndang na gabe dirajai arta portibi on, marlambok ni roha, parholong roha, marroha na ias, siboan dame jala barane manghatindanghon haporseaonna tu Jesus Kristus. Ido do dalan habagiaon. Memang tung na mansai borat do mangulahon on, alana porlu pengorbanan. Alai alana ndang olo hita marhansit-hansit, gabe ndang taulahon aha naung didok ni Jesus on. Hape molo barane hita mangulahon aha naung didok ni Jesus, da tung so marlasniroha hita. Soba hita ma mangulahon hata ni Jesus on, pasti do jumpangta lasniroha na so tartuhor marhitet agiaha pe. Ndang mungkin margabus Jesus i mandok hata on. Barane do hita mengulahon hata ni Jesus on?

Posted in: Renungan Harian