RENUNGAN HARIAN

RENUNGAN HARIAN BAHASA TOBA :

MEI 2009
PEKAN PASKAH IV

Jumat, 1 Mei 2009, Minggu Paska IV
Ulaoan 9:1-20; Joh 6.53-60
“Tung na so dapot hamu hangoluan i, molo so dipangan hamu daging ni Anak ni jolma i, jala so diinum hamu mudarna!”

Somalna di ulaon ni hita halak batak, ulaon marsipanganon manang marindahan pogu tung mansai porlu hian. Gariada olo do sipata bagak dohot balga ni ulaon i dietong sian ulaon marsipanganon. Molo sude na torop i dapotan mangan, bagak ma didok ulaon i. Jala di hita halak batak ulaon marindahan pogu, ima sada ulu ni sada ulaon. Molo nunga marsipanganon, dietong ma nunga beres sude ulaon i. Jala di tingki ulaon si songoni somalna angkukna ima jagal manang nadidok namarminyak minyak do dipatupa. Sian hasomalan on tangkas ma tung mansai porlu hian sipanganon dohot mai jagal laho diparngoluan songon i muse diparadaton. Dibahen i, mura ma ta antusi aha na nidok ni Jesus di barita nauli sadari on. Alai na gabe sungkun-sungkun di hita, “Ai boha do hita manganhon daging dohot minum mudar ni Jesus?” Bah ai ndang na gabe siallang jolma hita songon si anu na hea tarbarita di hutanta?
Tontu ndang i lapatanna. Alai na laho didok di si, ta haporseai ma Jesus i Tuhan Debatanta, ai ndang boi mangolu hita anggo so mardongan ibana, ndang boi sahat hita tu hasonangan na manontong anggo so marhite ibana jala haporseaon i diparngoluhon. Songon sipanganon na ta pangan mangalehon ngolu dohot gogo di hita, songon i ma nian haporseaon i, songon na jotjot didok, sai anggiat ma haporseaon i mamurnas tu daging jala saudara tu bohi.

Sabtu, 2 Mei 2009 Minggu Paska IV
Ulaon 9:31-42; Joh 6:60-69
“Tung tu ise ma hami laho, ale Tuhan? Di Ho do hata hangoluan sisalelenglelengna!”

Sipata do ninna dongan, “Bah nunga lupa rimbang!” Hata on dihatahon molo adong sasahalak na nunga lupa manang maila patuduhon jala pabotohon sian dia asalna. Rupani i, antar so diboto be marhata batak, sai marhata indonesia manang marhata linggis eh inggeris ibana, ndang dipangke be margana, dohot ma muse ndang diboto be anggo saotik soal adat Batak. Sidalianna didok ai jolma na modern nama nuaeng, hape na maila do dihabatakonna, dietong ibana halak batak i kolot, umhebat adat di halak na asing di ibana. Hape sasintong na, ndang diboto ibana hamoraon ni adat batak jala ndang olo ibana marsiajar.
Songon ni ma hita jotjot taringot tu haporseaon. Tung mansai mura hita manimbil sian haporseaonta tu Jesus, alana maila, manang olo do alani arta, jabatan dohot pangkat. Godang do muse na so mangantusi hamoraon na adong di bagasan haporseaon Kristen, jala muse ndang olo marsiajar. Hape molo tutu manghaporseai Jesus Kristus tung na jumpang na do hahalas ni roha bolon. Dibahen i molo manghirim hita di hangoluan na manontong, hot ma hita dihaporseaon tu Jesus Kristus, jala ta lehon ma tingki marsiajar taringot tu hamoraon di haporseoan Kristen.

Posted in: Renungan Harian