SALAM MARIA PENUH RAHMAT, TUHAN SERTAMU. TERPUJILAH ENGKAU DI ANTARA WANITA, DAN TERPUJILAH BUAH TUBUHMU YESUS. SANTA MARIA BUNDA ALLAH, DOAKANLAH KAMI ORANG YANG BERDOSA INI, SEKARANG DAN WAKTU KAMI MATI. AMIN.

RENUNGAN HARIAN

RENUNGAN HARIAN BAHASA TOBA :
Minggu, 10 Mei 2009: Minggu Paskah V
Ulaon 9:26-31; 1Joh 3:18-24; Joh 15:1-8
“Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu.”



Molo ta ingot tingki di bonapasogit, ta dok majo ranting ni mangga manang ranting ni unte i ndang na laho marparbue anggo so sada dohot batangna, jala molo adong ranting na so marparbue, sai nagotaponni partani i do, asa lam godang boras ni ranting na marparbue.
Songon i muse parumpamaan na sadari on, ima didok Jesus, na ibana do hau Anggur jala hita manisia ranting-rantingna. Parumpaman on laho pabotohon, na tung mansai balga holong ni Jesus Kristus tu hita. Ala ni balga ni holong na, olo ibana gabe mual ni hangoluan tu hita, jala ibana pe laho mangalehon ngolu na tung mansai bagak tu hita jolma. Alai ngolu i boi tajalo molo marsada hita dohot ibana.
Marsada dohot Jesus Kristus ido na mengalehon ngolu tu hita jala na mambahen marparbue ngolunta. Alai tung mansai godang do jolma di zaman on, merasa dirina boi mangolu jala mangulahon saluhutna ndang pola ingkon mardongan Jesus Kristus, merasa ndang porlu Tuhan i di ibana. Porsea ma hita, ngolu na dao jala malua sian Debata, ndang na laho jumpang na habagiaon, alai hagoan do jumpang na.

Senin 11 Mei 2009: Minggu Paskah V
Ulaon 14:5-18; Joh 14:21-26
“Ganup na holong roha di Ahu, radotan ni i do hatangki, jala haholongan ni Damang ma ibana, gabe ro ma Hami manopot ibana, maringanan tubagasan ibana.”

Ansugari adong sada ama-ama na mandok, tunga mansai holong rohana tu parsonduk bolonna dohot tu keluargana alai holan na di lapo tuak ibana, ndang hea karejo tu balian, toho do nadidok nai, ima na holong roha tu keluargana? Tontu sude hita satolop mangalusi bahwa ndang toho na nidok ni ama-ama i,kesset doi. Alana holong ingkon dipataridahon di pambahenan na denggan dohot tanggungjawab tu keluargana.
Songon i do muse na nidok ni Jesus tu hita sadari on, “Ganup na holong roha di Ahu, radotan ni i do hatangki, jala haholongan ni Damang ma ibana, gabe ro ma Hami manopot ibana, maringanan tubagasan ibana.” Holong tu Jesus Kristus ingkon do dipataridahon dibagasan ngolu siadapari, marhite pingkiran, panghataion, dohot pambahenan na denggan jala nauli. Mangulahon patikni Debata ndang gabe sada pilihan di hita kristen, alai na ingkon do taulahon tanda holong ni rohanta tu ibana.
Ulos suri-suri, rio-rio di tonga-tonga.
Hata nauli naung pinasahat ni Jesus tu hita, taulahon ma martonga ni ngolunta.

Selasa, 12 Mei 2009: Minggu Paskah V
Ulaon 14:19-28; Joh 14:27-31a
“Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna!”

Tona ni natua-tua tu angka pinomparna andorang so monding, jotjot do gabe sada gogo di angka pinomparna.
Antar songon i ma na pinasahat ni Jesus tu angka siseanNa andorang so borhat ibana manadinghon nasida, mulak tu Debata Ama i. Ai doboto Jesus do lungunni riha ni angka siseanNa diparlaona mulak tu Debata Ama, jala tung mansai balga holong ni Jesus tu nasida, ndang olo ibana mangida marsak roha ni sisean i. Alani i ma, andorang so borhat ibana didok tu siseanNa, “Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna!” Marhite hata ondeng, tangkas ma tu hita, molo tung pe nuaeng on ndang boi taida Jesus pa adop bohi, alai sai tong do didongani ibana hita di parngoluanta. Nunga dilehon Debata tu hita DameNa, lapatanna Debata manghaholongi hita, jala ibana sai tongtong raphon hita. Dibahen i, unang pola mabiar hita mangadopi ngolu dohot saluhut angka na masa, alai porsea ma hita, nunga dilehon Debata tu hita dameNa na so boi diagohon manang aha pe.

Rabu, 13 Mei 2009: Minggu Paskah V
Ulaon 15:1-6; Joh 15:1-8
“Ahu do hau anggur i, hamu do ranting i. Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu.”

Tung balganai antong holong ni Jesus i tu hita manisia, olo ibana marsada dohot ibana jala olo ibana gabe mual ni hangoluan di hita. Ndang holan i, olo ibana mambahen hita marparbue marlipatganda molo tongtong mian hita di bagasan ibana.
Dia maharoa lapatanna mian di bagasan ibana? ima marhaporseaon na tutu tu ibana, jala di bagasan haoprseaon i, hita pasahathon saluhut ngolunta tu ibana ala porsea hita, na ibana do mual ni hangoluanta. Ngolu si songon i, sai napasu-pasuon ni dEbata do, gariada marhite pasu-pasuNa i, gabe marparbue marlipatganda hita. Muse didok, manang aha pe napinangido ni rohanta molo tutu hita mian di bagasan ibana, sai na tangihonon ni Debata do. Jadi, haporseaon na tutu tu Jesus Kristus, ido na utama jala on do na gabe alus parsilisihan na tatangihon di panjahaon perojolo. Tangkas do dipabotohon tu hita, Debata ndang marnida adat, bahasa, hamoraon manang na asing, na pinangidona sian hita ima haporseaon na tutu tu ibana.

Kamis, 14 Mei 2009: Minggu Paskah V
Ulaon 1:15-17.20-26; Joh 15:9-11
PESTA MATIUS APOSTEL
“Songon holong ni roha ni Damang di Ahu, songon i do holong ni rohangku di hamu. Mian ma hamu di bagasan holong ni rohangki!”

Ra, hea do tabegei sarita na aotik gait ate. Di sada tingki ninna adong ma sada parjamita, tadok majo goarna, amani Jalomo, ibana marjamita di Gareja taringot tu na mangulahon holong. Ninna ma tu angka ruas na pungu di gareja i, “Di hamu angka ruas, ingkon ma hita marsihaholongan, tanda ni holong ta tu Debata. Rupani holong, ba molo nunga ta jalo pasu-pasu, ingkon barane do hita mangalehon godang tingki pelean, ai tu Debata doi marhite huriana, ai ndang tu ahu i. Songon i muse molo adong na dihita apalagi lobi sian sada, ba barane ma hita mangalehon tu nasonampuna.”
Tek ari holang, amantai laho mardalani, ai holan boruna do na mangingani bagas nasida. Di tingki i ro ma pangido-ido tu bagas nasida. Marnida i, marningot ma borunai di jamita ni amangna tingki di Gareja, ninna rohana ,”Didok bapakku, molo adong di hita apalagi lobi sian sada, ingkon barane mangaleho tu nasonampuna’, dibahen i baju ni bapakku adong dua setel, jadi hulehon ma 1 setel tu pangido-ido on”. Jadi dilehon boru nai ma 1 setel baju ni bapanai. Dung mulak bapanai, diida ma ndang disi be baju na digantunghon ibana di kamar, dungi disungkun ma boru nai, “Ai didia abithu na hugantung nangkin di son?” Dialusi boru nai ma, “Nangkin ro pangido-ido tu son, jadi hulehon tu ibana”. “Boasa dilehon ho?” ninna bapanai. Dungi dialusi borunai ma muse, “Alai ninna bapa tingki marjamita di Gareja, ‘molo adong na dihita apalagi lobi sian sada, ba barane ma hita mangalehon tu nasonampuna’, jadi hulehon sada tu pangido-ido i.” Umbegesa i tarsonggot ma bapanai jala ninna ma, “Ai ndang tu hita jamita i, tu ruas jala tu halak an doi!”
Songon i ma jotjot godang halak Kristen, tung mansai neang mandok ingkon hita marsihaholongan, alai ndang olo mangulahon holong marhite na mangulahon angka na denggan tu donganna. Muse tung mansai neang hita mandok, ahu halak Kristen, alai ndang olo mangulahon holong i. Hape didok Jesus ma tu hita, “Mangulahon holong ni roha tu angka dongan, ima tandana na tutu hita porsea tu Jesus Kristus, na tutu mangaradoti patikNa.”

Jumat, 15 Mei 2009: Minggu Paskah V
Ulaon 15:22-31; Joh 15:12-17
St. isidorus & St. pakomius
“Na sumeahon hosana humongkop angka alealena, i do parholong ni roha na so halompoan!”

Hea di nasadari ro ma mani Jaultop tu pastoran, manjumpangi pastor laho manghata-hatai taringot tu pamasu-masuon pardongan saripeon. Ninna amani Jaultop ima, “Amang pastor, ahu Vorhanger sian stasi A, jala nunga dua periode ahu gabe Vorhanger, jala nunga lelang ahu gabe pangula ni huria. Saonari ro ahu laho mangurus taringot pamasu-masuon anakta pastor, ai laho marrumatangga ibana.Dungi ninna muse, “Jujur ma hudok tu amang pastor, memang anakta on ndang kursus perkawinan dope, jala ndang di son saleleng on, ai dipangarantoan do, jadi hupangido tu pasto asa mangantusi hamu jala olio hamu jo pangidoanhu on.” Dungi ninna pastor ima, “Ba na denggan mai amang, dipersiaphon ma angka surat-surat do persyaratanna da, jala jolo kursus persiapn perkawinan majolo ibana.” Dialusli amani Jaultop ima, “Songonon do pastor, ai ndang sanga tingkina mangurus surat-suratna, jala ndang adong tingkina laho kursus persiapan perkawinan, alana holan 1 minggu do cutina, jadi hupangido hami asa 3 ari nai ma ulaon i.” Ninna pastor i ma mangalusi, “Ai ndang boi songoni amang, ingkon do taihuthon peraturan ni hurianta.” Umbegesai ninna amani Jaultop ma, “Huboto do peraturan ni amang, ai nunga leleng ahu gabe pangula ni huria, alai hupangido asa boi istimewa sahalion amang pastor, asa adong labana iba na pangula ni huria. Anggo so boi pastor, ndang adong hape labana ahu gabe pangula ni huria, jala anggo daong boi ninna pastor, mundur ma ahu sian pangula ni huria, songoni muse ra tumagon ma haluar ahu sian huria i.” Dungi haluar amani jaultop i, ditadinghon pastor i.
Songon i ma ra jotjot pangalaho ni angka dongan nuaeng on. Godang do na mangulahon sada ulaon na denggan, dohot ma i ulaon huria, alai ndang sian roha na ias situtu, alai mangalului balosna. Boha hita saluhutna? ingot hita ma hata ni Jesus na mandok, ““Na sumeahon hosana humongkop angka alealena, i do parholong ni roha na so halompoan!”

Sabtu, 16 Mei 2009: Minggu Paskah V
Ulaon 16:1-10; Joh 15:18-21
“Molo dihosomi portibi on on hamu, boto hamu ma, naung jumolo Ahu dihosomi”

Adong umpasa na mandok, “Eme na masak, igagat ursa. Aha na masa, ba i ma ta ula.” Hata undeng do na godang diparngoluhon manisia nuaeng on. Alana ninna roha ni nadeba, anggo so diihuthon na masa nuaeng on, ndang habagian hita. Alana memang di nuaeng on, tung mansai maol do gabe jolma na burju, na manghatindanghon habonaron, suang songoni laho mamparngoluhon haporseaon, uhumna dipasiding sian parngoluan, ninna ndang dapotan jambar, jala olo do dietong jolma sisongoni jolma narintik do, mateal-tealhon. On ma situasi na mambahen lungun ni roha, jala halak Kristen pe nunga godang mangulahon na masa nuaeng on, jala alani i, gabe mabiar jolma laho mangulahon na sintong. Alai tung pe songoni tontu sae na godang dope halak Kristen na tong hot dihaporseaonna, tung pe mardongan biar ni roha.
Aha na dialami halak Kristen nuaeng on, nunga diboto jala digombarhon Jesus di tingki i. Dibaheni do didok tu siseanNa, na ingkon do adopan ni nasida si songoni di nalaho mangihuthon ibana, alana ibana sandiri pe nung mangalami i. Alani i, dipodai Jesus hita asa unang pola mabiar hita, ai nungga dipillit Jesus hita sian tonga-tonga ni portibi on, dijadihon siseanNa. Dinaung jadi siseanNa hita, ibana sai na tongtong do raphon hita, mangurupi, mangalehon gogo jala molo tong hot hita laho mangihuthon ibana, ssai na jaloonta ma hangoluan na saleleng ni lelengna.

0 komentar:

Posting Komentar

VISITOR

free counters

Share

Twitter Delicious Facebook Digg Stumbleupon Favorites