RENUNGAN HARIAN

RENUNGAN HARIAN BAHASA TOBA

Kamis 18 Juni 2009
2 Kor 11:1-11; Mat 6:7-15
“Ai diboto Amamuna do na ringkot di hamuna, andorang so mangido dope hamu.”

Tangiang Amanami na diajarhon Jesus tu hita sadari on, tontu nunga hita tanda jala nunga jotjot hita tangianghon. Alai hurang do ra hita antusi habadiaon ni tangiang on. Gariada Alana nunga hita tanda jala nunga hita hapal tangiang on, gabe tingki manangianghon tangiang Amanami jotjot ditangianghon hatop hatop, sahira kareta api.
Habadiaon ni tangiang Amanami on, tangkas di hita ima Alana tangiang on dilehon Jesus sandiri tu hita. Habadiaon ni tangiang on, tangkas muse di isi ni tangiang i. Di bagasan tangiang i, dipaloas do hita mangjou, maggoari Debata i amangta, bapanta, amongta. Sian hata na jempet on sandiri, dipabotohon tu hita Debata i tung mansai jonok jala parholong roha tu hita, Alana olo do Ibana manjadihon hita gabe anak-doho boruNa. Marhite tangiang i, hita hatindaghonma holong ni Debata na sun balgai.
Di bagasan tangiang Amanami diajarhon do tu hita lapatan ni martagiang ima, martangiang ingkon ma nian haluar sian roha na tulus jala bulus. Tangiang na tutu ingkon ma haluar sian haporseaon tu Debata Ama i, na Ibana do Tuhan Debata na marhuaso, parholong roha, dibahen i Ibana ma ta somba jala manghirim hita marsaor dohot Ibana di ngolu na nuaeng on tarlumobi di ngolu na manontong. Tangiang i ingkon ma nian haluar sian haporseaon na Ibana do na tongtong mamasu-masu hita, jala ndang boi hita mangolu anggo so alani holongNa. Alani i do di bagasan tangiang hita pangido asa dipasu-pasu hita jala dilehon tu hita hangoluan di ngolunta siganup ari. Di bagasan tangiang Amanami diajarhon muse do asa barane hita mangakui hita jolma na gale, na jotjot madabu tu dosa, dibahen i hita elek Debata i asa tongtong manghaholongi hita, jala hita pangido asa sai tongtong Debata i mangalinggomi, mandongani hita asa unang masuk hita tu pangunjunan manang dosa. Jala muse tangiang na tutu, na haluar sian haporseaon ingkon ma manghorhon di angka dongan, ima tarida dipambahenan na denggan tu angka dongan.
Dibahen i, marhite tangiang Amanami na diajarhon Jesus tu hita sadari on, tangkasma tangiang on ingkon ma nian tatangianghon ganup ari tarlumobi di tingki manogot andorang so tamulai ulaonta di ari naimbaru. Ala tangkas di isini tangiang Amana nami didok, ‘lehon ma tu hami sadari on sipanganon nami siganup ari…unang togihon hamu tu pangunjunan.” Lapatanna boi didok, marhite tangiang i, hita pangido asa dilehon Debata tu hita pasu-pasu di sadari i, jala unang madabu hita tu dosa di sadari i. Jala tangiang Amani, gabe contoh tangiang na tutu. Bohado tangiangta saleleng on, tutu do haluar sian haporeaon, manang sahera na mandikte manang na mamaksa Debata i, asa Ibana mangulahon sangkapta?

Read More

RENUNGAN HARIAN

RENUNGAN HARIAN BAHASA TOBA :

Rabu, 17 Juni 2009
2Kor 9:6-11; Mat 6:1-6,16-18
“Asa jumpa dilehon ho asiasi, unang ma pola diboto tanganmu sihambirang na nilehon ni tanganmu siamun!”

Adong tolu parsiajaran na dipasahat Debata tu hita sadari on, ima:
1. Mangalehon asi-asi tu dongan.
2. Martangiang.
3. Marpuasa.
Taringot tu natolu i, unang pola ta sungkun, dia do jomolo na ingkon taulahon, dia naumporlu? Tolunsi i, tung mansai porlu, na ingkon di ulahon angka halak Kristen, tolunsi i sai na marhubungan do, ndang boi dipapulik-pulik.
Mangalehon asi asi tu dongan ima sada dalan patuduhon holong tu dongan, tanda hita na marhaporseaon na so dirajai arta portibi, na so holan mamingkirhon dirinta sambing, alai hita pingkirhon do angka dongan, jala olo hita marbagi las ni roha dohot angka dongan marhtie na mangalehon asi asi tu dongan. Manglehon asi-asi i ingkon gabe parbue ni tangiangta dohot puasonta.
Martangian i, ima tanda haporseoanta tu Debata, tanda holong ni rohanta natutu tu Debata. Gariada didok Jesus, tangiang i gabe sada tanda hubungan na tung mansai jonok tu Debata. Sahalak Kristen tontu ingkon do jotjot martangiang. Alai tung mansai jotjot do dongan i martangiang holan alana tarpaksa, holan ala adong na jinalona sian Debata. Molo tutu do tangiangtai, tontu ingkon marparbue do di pambahenan na denggan tu donang, olo mangalehon asiasi tu dongan, jala olo do marpuasa ibana.
Marpuasa, tontu ndang alani asa langsing manang diet. Marpuasa i ingkon gabe sada tanda dihaporseaon tu Debata, ima na holan Debata do Tuhan na tasomba jala tapuji. Dinamarpuasa hita, hita ulahon ma sada ngolu, ima naso dirajai arta manang portibi on hita, tanda ndang olo hita dirajai arta dohot portibi on. Mrhite na marpuasa i, tatuju ngolunta holan tu Debata. Rupani puasa on godang, boi ma i puasa sian mangulahon na hurang ture, puasa di sangkap dohot tahi ni dagingta, jala puasa di sipanganon dohot siinumon hita. Puasa i, ingkon gabe parbue ni tangiangta, jala puasa i ingkon do marlapatan tu dongan. Molo marpuasa hita ndang mangulahon hajahaton manang ulaon na so ture, jelas berarti hita ulahon ma na denggan tu dongan jala manghaholongi dongan. Molo marpuasa hita ndang holan mangulahon sangkap dohot tahinta sandiri, tontu tarida ma di ngolu na manghargai angka dongan. Molo marpuasa hita di sipanganon dohot siinumon, tontu tarida mai di nasapartianon hita di dongan na metmet, jala on taulahon marhite na olo mangalehon asiasi tu dongan. Tung mansai godang lapatanni asi-asi i apalagi molo sian parbue ni puasanta.
Natolu on, tung mansai ingkon diparngoluhon halak Kristen, alai dipasingot Jesus hita, asa hita ulahon i sian ias ni roha, unang asa dipuji jala dipasangap jolma hita, unang gabe pameran, jala unang pola dibaritahonon, asa unang gabe tubu ginjang ni roha di haporseaon hita. Molo tutu do sude i hita ulahon sian ias niroha, tontu ndang gabe mandele hita mangulhaon saluhutna i, tung pe ndang dipuji, ndang dipasangap jala ndang dihargai halak hita. Alai molo mandele do hita mangulahon sudenai alana ndang adong mamuji, ndang adong pasangaphon hita jala ndang adong na manghargai hita, boi do dohonon, berarti hita holan asa dipuji, dipasangap jala dihargai halak do hita.

Read More

RENUNGAN HARIAN

RENUNGAN HARIAN BAHASA TOBA :

Selasa, 16 Juni 200
Mat 5:43-48
“Holong ma rohamu di musumuna; tangiangkon hamu ma angka na paburuburu hamu”

Adong hata natua-tua n mandok, “Unang pardongan-dongan angka parjahat, asa unang gabe dohot ho jahat. Alai pardongan-donganma angka na burju, asa gabe burju ho.” Ra hata ondeng, ndang laho mandok asa hita pasiding angka parjahat, manang ta hosomi angka parjahat. Alai ra laho mandok, asa unang dohot hita mangulahon angka na jahat, manang unang dohot hita diulaon ni angka parjahat.
Anggo on do na laho didok di hata i, gabe dos ma songon na didok ni Jesus di barita nauli Sadari on. Alana didok Jesus do, somalna na masa di ngolunta angka dongan holan mardongan jala manghaholongi jolma na burju tu ibana, na menghaholongi didirina jala olodo muse holan mardongan na marlapatan manang mangalehon untung di ibana, angka jolma na so manghaholongi ibana, na so burju tu ibana dohot na so mangalehon untung di ibana, sai dihosomi do, jala dipasiding. Alai hata ni Jesus mandok, holongtai ingkon tu saluhut jolma, gariada dohot mai tu angka naung mambahen hansit rohanta, jala hita tangianghon nasida. Boasa songoni?
Alana songon naung tangkas didok Jesus, dijadihon Debata do mataniari dohot dilehon udan laho tu sude jolma. Sude jolma ai anak ni Debata do jala dihaholongi Debata do nasida. Sasintongna, ndang adong jolma naung jahat sian partubuna, ndang adong jolma i dijadihon Debata sian mulana parjahat. Jolma i mangulahon hajahaton alani parjahat i do na mambahen nasida songoni, ala ndang togu haporseonna gabe targoda ibana. Tung pe jolma i targoda mangulahon hajahaton, alai anggo holong ni Debata ndang gabe mandao sian ibana, hirim do rohani Debata asa muba nasida, jala mulak tu Debata. Alani i do sai dilehon Debata tingki tu nasida asa muba, jala ditogu-togu Debata do nasida asa muba, adong mai marhite angka na masa di ngoluna.
Marhite i, dipabotohon tu hita, saluhut jolma anak ni Debata do. Alai molo tung pe nasida mangulahon hajahaton tu hita manang tu halak, ndang sian partubuna songoni alai alana na gale do tondi dohot haporseaonna. Dos mai songon halak na marsahit. Tontu molo adong donganta na marsahit, pasti do taurupi boha ma asa malum ibana, ndang na gabe hitapasiding. Songoni pe angka donganta na mangulahon hajahaton manang na hurang, unang gabe ta pasiding, alai tahaholongi nasida. Molo tung pe ndang boi hita pajumpang, manang mangalehon poda tu nasida, alai unang hita pasiding, unang malah hita paboto-botohon tu halak na asing, unang gabe dipaila-ila, alai hita tangianghon nasida angiat muba.
Hata ni Jesus na mandok ingkon manghaholongi sude jolma, tong mai laho paluahon hita sian hadosaon. Alana sipata jolma i taetong burju, manghaholongi hita, manang marlapatan tu hita molo nasida mangulahon songon naung tapangido, songon sangkap ni rohanta. Hape belum tontu sudenai toho, denggan jala doshon sangkap ni Debata. Alai molo masa do sisongoni, pasti terjadi ma ngolu na papulik-pulikhon jolma marhite sangkap na ganup marsada-sada, gabe ndang adong me hasadaon dohot hadameon.
Angkup ni i muse, tangkas do hita boto, ndang adong jolma na malua sian hasalaan manang hahurangan maradophon dongan apalagi maradophon Debata. Alai tung pe songoni tong do dihaholongi Debata hita. Anggo Debata nunga manghaholongi, ndang pasidinghon hita, boasa hita ndang barane manghaholongi dongan sudena? Boasa hita barane pasidinghon angka donganta?

Read More

RENUNGAN HARIAN

RENUNGAN HARIAN BAHASA TOBA :

Senin 15 Juni 2009
2Kor 6:1-10; Mat 5:38-42

“unang alo hamu na jahat! Molo adong na mamastap hurum siamunmi, tarehon ma nang hurummu sihambirang!”

Sipata jala jotjot angka hata ni Jesus maralo dohot sangkapta, sangkap ni hajolmaon, suang songon i dohot angka na masa di parngoluanta. Rupani i songon na tatangihon sadari on. Ra ninna angka dongan, ‘Boha do mungkin boi taulahon hata on, alana ai molo so nialo parjahat i, lam rarat do, lam lomo-lomona, dirimpu hita na gale!’ Jala i do na jotjot masa di masyarakatta. Godang masa parbadaan: adong mai parsingkola dohot parsingkola, adong mai sada huta dohot huta na asing, na sasintongna marbonsir laho mambalos naso denggan naung dibahen alona i tu ibana. Alani bossir songon i, gabe torus ma adong parbadaan, ai marsibalosan ma nasida na marbadai i. Sadari on, Jesus mengajarhon asing sian na masa di ngolu ni jolma dohot masyarakat. Diajarhon do asa unang hita mambalos najahat i dohot pambahenan na jahat tu nasida. Taringot tu hataNa on, ai nunga diulahon Jesus sandiri di ngoluna, na gabe tudos-studos tu hita. Ibana ndang mambalos hajahaton mandang dosa naung taula tu Ibana, alai sai tong do dihaholongi ibana hita, gariada olo Ibana mate laho paluahon hita. Ansugari songon roha ni jolma Tuhan i, tontu ndang adong hita na boi mangolu, alana tung mansai godang dosa na taula maradphon ibana. Alai mauliate ma di Debata, ai parholong roha do ibana jala parlambas roha. Alani saluhutnai, gabe marlasniroha ma hita jolma. Dibahen i, marsiajar ma hita tu Jesus Kristus, jala taulahon ma hataNa mangajari hita asa mangolu di bagsan holong ni roha tu dongan, marlambok roha, marlambas roha jala olo mammaaf on hahurangan manang sala ni angka dongan. Holan marhite na mangulahon i do hita boi manghilala dame ni Jesus Kristus.

Read More

RENUNGAN HARIAN

RENUNGAN HARIAN BAHASA TOBA :

Minggu 14 Juni 2009
ARI REA PAMATANG DOHOT MUDAR NI KRISTUS
Kel 24:3-8; Mzm 116:12-13,15-16bc, 17-18,; ibr 9:11-15; Mrk 14:12-16,22-26

“Jalo hamu ma; Dagingku do on! Mudarhu do on, mudar parpadanan i, na niusehon humongkop torop halak.”

Tung mansai bagas do haporseaon di Ekaristi Nabadia, alana tangkas do diajarhon ima dina mangarayahon Ekaristi Nabadia tarayahon ma Jesus Kristus naung mengalehon diriNa gabe sipanganon, mudarNa gabe siinumon partondion tu hita, laho dihaluaonta. Tung mansai balga holong ni Jesus Kristus tu hita, alani i do olo Ibana memelehon diriNa laho dihaluaonta. On ma na taingot di ganup na mangarayahon Ekaristi Nabadia. Alai tangkas ma ta boto, molo didok marningot, ndang berarti holan mangingot-ingot aha naung hea diulahon Jesus 2000 taon naung salpo. Alai na laho didok di si, di ulaon Ekaristi Nabadia, Jesus i tutu ro marhite roti dohot anggur, jala laho marsaor dohot hita. Dibahen i, di namanjalo komuni Nabadia hita di tingki ulaon Ekaristi Nabadia, marsaor ma hita dohot Ibana, Ibana dohot hita. Boha do boi i, ai roti manang hosti do na tajalo? Tutu, rupana roti, alai nunga diubah Tondi Porbadia gabe pamatang ni Jesus Kristus marhite tangiang na ditangianghon malim di tingki ulaon i. Bagas nai antong haporseaonta on, jala tabo nai antong hita on, alana olo do Jesus marsaor dohot hita.
Alai godang do halak katolik na mangantusi jala manghaporseai on? Ndang godang be halak katolik na mangantusi jala manghaporseai on. Anggo tutu do diantusi jala di haporseai, tontu sai manghirim do rohana laho parsidohot di ekaristi Nabadia, tontu dipaihut-ihut ulaon Nabadia i di bagasan haporseaon na gok dibagasan nasa roha dohot ngoluna. Alai olo do dongan i tarlambat ro tu Ekaristi Nabadia, modom di tingki Ekaristi, gariada olo do sambil mar-sms.
Di ari Rea Pamatang dohot Mudar ni Jesus Kristus sadari on, hita dijou laho manghilalahon holong ni Jesus Kristus na tung mansai balga tu hita. Jesus manjou hita asa marsaor dohot ibana marhite na manjalo Komuni Nabadia di tingki Ekaristi Nabadia, ndang holan tingki ari Rea Partamueon naparpudi, alai di ganup ulaon Ekaristi Nabadia. Jala tontu, parsaoran dohot Jesus i, ingkon do manghorhon di parngluanta siganup ari.
Di ari Rea Pamatang dohot Mudar ni Kristus on, martangiang ma hita, asa tondi Porbadia i sai tongtong mangurupi hita, mian di bagasan rohanta, asa boi hita mengihuthon Ekaristi Nabadia i sian nasa rohanta dohot ngolunt, jala marhite i boi tahilala parsaoranta dohot Jesus Kristus.

Read More

RENUNGAN HARIAN

RENUNGAN HARIAN BAHASA TOBA :

Sabtu 13 Juni 2009
2Kor 5:14-21; Mat 5:33-37
Pw. St. Antonius dari Padua, imPujG

“Olo, anggo olo; ndang, ia ndang! Nasa na ganda sian i, sian na jahat do i!”

Ninna halak, halak Batak i karas, tegas, parhata sada, molo A ninna ba A do, molo daong ninna ba daong. On ma sada partinandaan ni naso halak batak tu halak Batak. On sada habanggaon do, alana tegas di prinsip, ndang mura meol-meol. Alai tong dope songoni hita halak Batak? Ra ndang pola godang be halak Batak na songoni.
Ansugari karakter songoni tong mangolu di halak Batak, tontu ndang pola maol hita antusi dohot ulahononta na didok ni Jesus sadari on. Jesus mangido asa angka siseanNa togu ni prinsip. Ndang lomo roha ni Jesus molo siseanNa i mura ganggu rohana, molo daong ba daong, molo ‘olo’ ba ‘olo’. Alai aha nadidok i ingkon do diulahon. Unang ‘olo’ ninna alai ndang iulahon. Daong ninna, jala memang ndang diulahon. Jesus mangido asa hita tegas di parngoluan, songoni muse taringot tu haporseaon. Molo ‘olo’ ninna hita tu Jesus, lapatanna porseama hita tu ibana, rade ma hita mangulahon aha nadidokNa dohot naniajarhonNa, jala molo ‘olo’ tadok, sahat ma hita tu haluaon na manontong. Alai molo ‘daong’ ninna hita, lapatanna hita tolak ma haluaon i. Alai nuaeng on, godang do halak Kristen na mandok dirina halak Kristen, alai dang diulahon jala diparngoluhon hakristenonna. Rupani i, hea ma sahali pastor laho tu stasi laho marhuria. Sahat di stasi holan vorhanger na adong jumpangna di gareja. Disungkun pastor ma, “Ai diumumhon do na ro pastor sadari on amang?” Diumumhon do nian pastor, alai dia ma dohonon, adong na mate di huta, jala tu si do sude ruasta.”ninna pangula ni huria i mangalusi. Adong do muse na so hea manang malas margareja, dohot sidalian mansari. Ba adong do muse alani pangkat, arta, maila pabotohon ugamana, gariada olo maninggalhon ugama. Hape ninna olo gabe Kristen, alai ndang diulahon. Tudos-tudos taringot na daulat di alusna, ima nabadia Antonius Padua na sadari on tataringoti. Sian na metmet sai tubu rohana laho gabe pastor, alai natua-tuana ndang mangaloas, alanai manghirim nasida alai ibana anak sasada, asa ibana haduan gabe halak na terkenal. Umur 11 taon, monding natua-tuana, gabe diurus bapa udana ibana. Sinta-sinta na laho gabe pastor ndang muba, tung pe bapa udana ndang mangaloas. Alai diujung, ala sai tong margogo ibana, jala hot di sinta-sintana, gabe di loas ma ibana. Saonari boha hita, hot do hita di padan naung taolohon, talumobi na taulahon di adopan ni Debata?

Read More