RENUNGAN HARIAN

RENUNGAN HARIAN BAHASA TOBA:
Sabtu 18 Juli 2009
St. Frederik sian Utrecht
Kel 12:37-42 ; Mat 12:14-21

"Ida ma naposongku na hupillit i, haholonganku jala hasoloan ni rohangku do Ibana; ampehononku do Tondingku tu Ibana, jala lumbahononna ma uhum tu angka bangso.(Mat 12:18)

Roha na ias, sai na manghalomohon angka na denggan jala nauli, jala nasida mardongan do dohot angka na burju roha. Alai roha na roa, sai na manghasogohon angka na denggan, jala sai na maralo dohot angka na burju roha. On ma na adong di halak Parise. Tung mansai sogo hian roha ni nasida tu Jesus na mangulahon angka na denggan, manghatahon angka na sintong jala mambahen angka hahomion bolon. Sai na maralo do nasida tu Jesus, gariada marencana do nasida laho manguhumi Jesus.
Andul sian roha ni angka Parise tu roha ni Debata. Tangkas do hita boto marhite sian panjahaon parjolo, ima roha ni Debata i tung mansai ias jala badia tahe. Ai sian mulanai do dihaholongi Debata jolma, sai na dihalomohon Debata do jolma malua sian angka sitaonon dohot hamatean. Di panjahaon parjolo tangkas hita boto, halak Israel dijajah halak Mesir, halak na so mananda Debata. Ndang olo Tuhan i bangsoNa i mago. Dibahen i, dipalua Debata do halak Israel sian huta ni halak Mesir marhite panurirangNa si Musa. Gariada tahe, diboan Ibana do nasida tu sada inganan naung dijanjihon ni Debata tu nasida. Sarita taringot tu halak Israel na dipalua Debata sian huta Mesir marhite si Musa, gabe sada tudos-tudos do on tu hita taringot tu holong ni Debata tu jolma i. Debat ndang olo jolma mate dijajah angka dosa. Songon halak Israel dipalua sian huta Mesir na so mananda Debata, songoni pe sai na paluaonNa do hita sian sibolis manang angka dosanta. Aha nabinahen ni Debata najolo tu halak Israel, diulahon Debata do tu Hita marhite Jesus Kristus. Jesus Kristus ro laho mamboan hita haluar sian dosa namamboan hita tu hamatean. Tung mansai manghirim do Debata i, asa sude hita sahat tu inganan naung dijanjihon Debata tu hita, ima surgo hasonangan i. Alai ingot hita ma, halak Israel haluar sian tano Mesir, Alana nasida mangoloi hata ni si Musa. Songoni pe hita, sai nasahat do hita tu ngulo hasonangan i molo olo hita mengihuthon Jesus Kristus. Asing ni i muse, songon si Muse manangihon jala mangulahon tohonan naung jinalona sian Debata asa mamboan halak Israel sian tano Mesir, songoni pe hita, sai anggiat ma hita boi mamboan angka donganta haluar sian angka hasusaan, sian angka parsoalan, sian hadosaon jala mamboan nasida porsea tu Debata.

Read More

RENUNGAN HARIAN

RENUNGAN HARIAN BAHASA TOBA:
Jumat 17 Juli 2009
Kel 11:10-12:14; Mat 12:1-8

"Ai guru di Anak ni jolma i do nang ari Sabbat i!" (Mat 12:8)

Hea sahali tingki misa lingkungan ahu, markareta ma ahu tu inganan misa lingkungan, jala hupangke ma helm. Dung sahat tu inganan i, adong ma ruas na mandok, “Ai boasa pola merhelem pastor, ai so adong polisi borngin-borngin.” Hualusi ma denget sambil margait, “Ai ndang laho tu polisi helem on hupengke, alai laho tu simajujunghu do.” Umbegesai mengkel sumbing ma nasida.
Di parngoluan on, godang angka aturan. Angka aturan i porlu laho mangatur ngolunta on asa lam tubagakna. Alai olo do sipata angka peraturan i dibahen sasahalak manang kelompok laho dikepentingan ni nasida, ndang laho asa denggan parngoluaon on. On do na binahen ni angka Parise. Dibahen angka parise i peraturan holan laho dikepentingan nasida sandiri do, jala peraturan i manamba sitaonon tu angka jolma tarlumobi angka na metmet. Adong mai muse jolma i mangulahon peraturan ndang sian ias ni rohana namanghaporseai peraturan i tung mansai porlu ingkon siihutono, alai holing mangulahon peraturan i sambing do, manang peraturan i diulahon molo diida jolma, songon pengalaman na di ginjang.
Sadari on molo hita jaha barita Nauli, ninna rohanta Jesus i ndang mangihuthon peraturan. Ndang i na laho diondolhon di Barita Nauli sadari on, alai nalaho diondolhon ima pangalaho di angka Parise i na pantang sodaulat tu peraturan jala nasida sai mambahen peraturan i holan laho menindos angka na metmet, jala laho dikepentingan nasida. Jala marhite nadidok ni Jesus sadari on, laho didok tu hita asa unang hita ulahon peraturan holan mangulahon sambing, alai hita ulahon mai sian ias ni roha. Ias ni roha mangulahon peraturan tarida do sian pangalaho na mangulahon di bagasan las ni roha, ndang marungut-ungut, ndang molo didida dongan asa diulahon, jala tarida do dipambahenan holong tu angka dongan. Muse didok, unang ma hita mura-mura mambahen peraturan, holan laho dikepentinganta sandiri.

Read More

RENUNGAN HARIAN

RENUNGAN HARIAN BAHASA TOBA:
Kamis 16 Juli 2009
HARI RAYA MARIA BUNDA KARMEL

Kel 3:13-20 ; Mat 11:28-30

“Ro ma hamu tu Ahu, hamu angka na loja jala na sorat, asa hupasonang hamu! (Mat 11:28)

Riwayat latar belakang

Kitab Suci memuji keindahan Gunung Karmel, tempat Nabi Elia membela kemurnian iman bangsa Israel akan Allah yang hidup. Pada awal abad ke-13, lahirlah di sana secara resmi menurut hukum Ordo Karmel dengan gelar Santa Perawan Maria dari Gunung Karmel. Sebagai rangkuman dari segala kebaikan dan anugerah yang diberikan sebagai pelindung kepada Ordo Karmel, gelar tersebut mulai dirayakan secara meriah sejak abad ke-14, mula-mula di Inggris, kemudian secara perlahan-lahan menyebarluas ke seluruh Ordo Karmel. Perayaan ini mencapai puncaknya pada permulaan abad ke-17. Pada waktu itu Kapitel Jendral menetapkkanya sebagai pesta utama dan istimewa Ordo Karmel dan oleh Paus Paulus V diakui dengan gelar khusus sebagai Persaudaraan sakpulir.


Ndang adong ngolu na malua sian parsoalan ngolu, gariada sipata tung mansai borat hita hilala. Songoni angka naporsea, na burju marhaporseaon, tong do ndang boi malua sian angka pangunjunan, parsoalan, gariada sipata umbalga dihilala. Alai borat manang neang sitaonon manang parsoalan na ro i, tergantung boha do hita mangadopi saluhutnai. Molo holan hitaparbaga do gogonta sambing, parsoalan i tung mansai borat, jala olo ndang tolap dodonta. Songon i muse, parsoalan i gabe tung mansai borat, molo hita holan manghalomohon lomonta sandiri. Molo nunga ro si songoni i, aha do na jotjot dibahen angka dongan? Godang dongan i gabe tung mansai marsak, olo do pintor laho tu datu, jala olo do gabe maningkot poan.
Alai ingot hita ma sadari on hata ni Jesus na manjou jala marsuru hita asa rot u Ibana molo adong ro angka sitaonon manang parsoalan na tung mansai porsuk. Ai marjanji do Ibana na laho pasonanganNa do hita. Ro tu Jesus, boi mai dohonon pasahathon saluhut angka nahita alami tu Ibana, boi doi muse marunduk ni roha mangido pangurupion jala sai tongtong marhaporseaon tu Ibana jala marposniroha tu Ibana. Porseama hita, ai Debata namarhuaso jala parholong roha do Ibana, sai urupanna do hita. Jala on do nabinahen jala dialami Ordo Karmel di tingki mula jongjong nasida. Dialami Ordo Karmel i do na godang parsoalan diadopi nasida, jala nasida pasahathon jala mangido pangurupion sian Debata marhite Maria nabadia. Pangidoan ni nasida dipasaut Debata. Jala alani I do, Maria nabadia dibahen nasida gabe pelindungnna..Unang alani parsoalan gabe nganggu rohanta jala lilu haporseaonta, alai ro ma hita tu Ibana. Amin.

Read More

RENUNGAN HARIAN

RENUNGAN HARIAN BAHASA TOBA:
Rabu 14 Juli 2009
Kel 3:1-6,9-12 ; Mat 11:25-27

Uju i ma didok Jesus hatana songon on: Hupuji Ho, Amang, Tuhan na manggomgomi banua ginjang dohot tano on, ala ditamondingkon Ho hata i sian jolo ni angka na pistar dohot na marroha, gabe dipapatar Ho i tu angka siondihononhon. ( Mat 11:25 )

Ginjang ni roha olo gabe mula ni hasesega. Alana ginjang ni roha I mambahen hita ndang olo mangakui jala manjalo haburjuon ni dongan, gariada olo gabe tahasogohon nasida. Ginjang ni roha olo gabe mambahen hita ndang olo manangihon jala marsiajar sian aha nanidok ni dongan. Alana ninna rohana, ibana do na ummalo, ibana ingkon gabe nomor sada. Alai unduk ni roha mambahen jolma I lam maju, Alana sai na olo do ibana manjalo jala mangulahon angka na denggan napinasahat ni dongan, jala angka dongan ipe sai na rade do mangurupi nasida.
On ma impola napinasahat ni Jesus tu hita sadari on marhite Barita Nauli. Songoni ma nian hita diadopan ni Debata. Roha na unduk di adopan ni Debata ima, na tongtong ndang holan mangasahon gogo dohot hamaloonna, alai sai tongtong do marpanghirimon di huaso dohot holong ni roha ni Debata.

Read More

RENUNGAN HARIAN

RENUNGAN HARIAN BAHASA TOBA:
Selasa 14 Juli 2009
Kel 2:1-15a ; Mat 11:20-24

“Marjea ma ho, Korasin! Marjea ma ho, Betsaida! Ai aut di huta Tirus dohot Sidon dipamasa hagogoon angka na masa di hamu, ndang tarbahen so paubaonna rohana uju i, marabithon goni, hundul di orbuk!” (Mat 11:21)

Songgot do ra rohanta tingki manjaha manang mangihon hata ni Jesus on, ima na mandok marjea tu angka Korasin dohot Betsaida. Didok Jesus songon i tu nasida, ala nunga godang dibahen Jesus ulaon hahomion bolon di huta iI, alai tong ndang marna porsea nasida tu Jesus mesias. Alani i do binahen na didok Jesus hata ondeng tu nasida. Alai tung pe didok Jesus songon i nasida, ndang apala na sogo roha ni Jesus tu nasida, ndang apala na laho diuhum Jesus nasida. Hata ondeng sasintong na marisi holso dohot lungun ni rohani Jesus marnida hajogalon nasida na so olo porsea tu Ibana. Jala na mambahen nasida marjea ndang Jesus, alai pangalaho nasida i do na jogal rungkung. Marhite hata i, laho didok ima jolma na so olo porsea sai na gabe marjea do alani pangalaho na.
Dibahen i, tangkas ma hita parrohahon hata ni Jesus on. Ai nunga godang tudos-tudos hita ida manang tabegei taringot tu ngolu na maralu tu hata ni Jesus, sai na tuhajeaon manang tu hamatean do ujung ni ngolu nasida. Nunga jotjot dipodai Jesus hita marhite hataNa, pangajarionNa marhite HuriaNa, marhite angka parjamita manang angka panurirang, alai tung mansai maol hita dohot angka dongan i porsea jala mangulahon i saluhutna. Alani i, hita tangihon jala ulahon ma hata ni Jesus, ungan sai marjogal rungkung hita jala unang sampe marjea ngolunta alani i sude. Amin.

Read More

RENUNGAN HARIAN

RENUNGAN HARIAN BAHASA TOBA:
Senin 13 Juli 2009
Kel 1:8-14,22; Mat 10:34-11:1

“Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot.” (Mat 10:39)

Umbegesa hata ni Jesus di Barita Nauli sadari on, ra gabe marpingkir hita, “Bah, na gabe pabada-badahon do Jesus, ndang na mamboan dame di ngolu ni jolma? Pingkiran on boi do tubu di rohanta molo hurang hita antusi hata ni Jesus i. Tangkas ma hita haporseai, Jesus i ro laho mamboan dame na manontong di hita jolma. Holan memang dalan dohot dame nabinoan ni Jesus i tung mansai maralo do dohot pingkiran manang sangkap ni jolma, suang songoni muse andul dohot na somal di ngolunta. On do mambahen na gabe adong parsoalan di parroni Jesus, ai pasti do tubu di rohanta sungkun-sungkun, “Mangulahon hata ni Debata do manang sangkap ni rohanta sandiri?” Molo hita ulahon hata ni debata i, tontu maralo dohot sangkat ni rohanta, dohot na somal di ngolu nuaeng, jala jotjot hita ndang olo hagoan sangkap ni rohanta i. Dina mangulahon hata ni Debata, ndang holan gabe persoalan dohot sangkap ni daging manang roha, lai dohot mai muse dohot angka dongan na so manghalomohon na denggan. Taringot tu son, nunga boi ra hita ida manang alami boha boratna gabe halak Kristen manang gabe jolma na burju, sai godang do ambat-ambat jala sai adong do jolma na so marlomo ni roha di hita. Alai tung pe songon i, tangkas ma hita haporseai, manangihon jala mangulahon hata ni Debata i, ido mamboan hita tu hangoluan dohon habagiaon na manontong. Dibahen i, Jesus mangido hita mandabuhon pilihan, mangihuthon Ibana do manang daong. Borat do mangalusi kan?

Read More

RENUNGAN HARIAN

RENUNGAN HARIAN BAHASA TOBA:
Minggu 12 Juli 2009
Am 7:12-15; Mzm 85:9ab,10,11-12,13-14; Ef 1:3-14 (Ef 1:3-10); Mrk 6:7-13

“Dung i dijou ma na sampuludua i jumonok, dipungka ma marsuru nasida marduadua, dilehon ma tu nasida huaso mamaksa angka tondi na hodar!”

(Mrk 6:7)

Ra hea do hita tonton di TV iklan kampanye ni Presiden SBY di tingki laho mancalonhon muse ibana. Di iklan i dipataridahon angka jolma na mamuji pamarenta nuaeng on ima SBY jala di si didok joma i, “Mauliate ma di pamarenta nuaeng on alana 3 hali turun arga ni minyak, biaya singkola gabe mura …” Alai didok si SBY alusna, “Unang dok hamu songon i, gariada ahu do mandok mauliate tu angka rakyat, alana sude i ndang alani gogonghu, alai alana perjuangan dohot kerja keras ni angka rakyat do i.”
Tung mansai bagak iklan on, ima alus ni si SBY. Toho manang daong aha nadidok nai sian ias ni rohana, ba urusanna mai. Alai nalaho hita dok, tung mansai andul alusnai dohot angka na masa di nuaeng on, ima tung mansai godang jolma i pabangga-bangga manang paburnang-burnang na binahenna. Angka nabinahennai didok holan alani haburjuon, hamaloonna sambing do, gariada didok anggo so alani ibana i, sudenai ndang boi mardalan. On ma goarna ginjang ni roha.
Alai didok Jesus tu siseanNa suang songoni tu hita, molo hita ulaon angka na denggan, nauli dohot ulaon pararathon Harajaon ni Debata, unang ma laho mangalului sangap di hita, alai sai hita ulahon mai laho mamuji jala pasangaphon Debata. Unang hita haginjanghon bahwa sudenai i hita ulaon holan alani hita sandiri. Unang ma songoni hita, alai ingkon tongtong marunduk ni roha hita, bahwa sudenai boi hita ulaon holan alani holong dohot pangurupion ni Debata tu hita. Sai tongtong ma hita marunduk ni roha, manat hita, unang gabe tubu ginjang ni roha di hita. Amin.

Read More

RENUNGAN HARIAN

RENUNGAN HARIAN BAHASA TOBA:
Sabtu 11 Juli 2009
Kej 49:29-32;50:51-26a ; Mat 10:24-33

“Unang pola mabiar hamu mida angka na mambunu daging, angka na so tuk mambunu tondi!” (Mat 10:28)

Godang do jolma di nuaeng on na tung mansai marsak alani boratni parngoluan nuaeng on. Jotjot do sungkun-sungkun roha ni angka dongan, “Tolap do ahu laho mangadopi borat ni ngolu nuaeng on? Jala on do gabe ninna, “Tarhona laho manghatindanghon haporseaon dohot gabe pararat barita Harajaon ni Debata, ai holan laho mangolu sambing pe tung mansai borat.” Olo do borat ni ngolu nadiadopi gabe sidalian laho ndang mangulahon saluhutnai.
Alai parrohahon hita jala tahaporseai ma hata ni Tuhan sadari on. Ai didok Jesus i do tu hita, na tunga mansai arga do hita di Ibana, ummarga jolma i sian saluhut naung dijadihon Debata, didok muse tung mansai tangkas do ditanda jala diboto Ibana hita, ndang adong na dao sian pamotoanNa. Alana tung mansai arga hita di Ibana, tontu ndang pasombuonNa hita mago alani borat ni parngoluan, alai porseama hita na sai uruponNa do hita. On do na hurang hita haporseai. Sai jot-jot do hita holan mangau tu gogonta sandiri, nunga hurang porsea hita na adong do Debata parhuaso dohot parholong roha na mandongani hita di parngoluonta sigabup ari. Parsoalanna, ‘Barane do hita porsea, mangihuthon hataNa jala marposniroha tu Jesus? Porsea ma hita, ai molo holan mangau tu gogonta sambing do laho mangadopi ngolu on, ndang na tolap hita, alai molo raphon Debata hita, sai na tolap do hita mangadopi jala manaluhon angka na borat na olo ro tu ganup ngolunta.

Read More

RENUNGAN HARIAN

RENUNGAN HARIAN BAHASA TOBA:
Jumat 10 Juli 2009
Kej 46:1-7,28-30 ; Mat 10:16-23

“Husuru do hamu songon birubiru tu tongatonga ni angka babiat; dibahen i pantas ma hamu marroha songon ulok, huhut lidang ma rohamuna songon darapati!” (Mat 10:16)

Hata Jesus di Barita Nauli sadari on, manorushon aha naung didok Jesus tu angka siseanNa di ari naung salpu. Di ari nantoari disuru Jesus do angka sisean i laho mambaritahon Harajaon ni Debata. Di sadari on dipatangkas Jesus do aha na pasti diadopi na sida di tingki mangulahon tohonan i, ima sai na ro do angka ambat-ambat. Alai dipapos Jesus do rohana nasida, asa unang pola mabiar di saluhutna i, ai nasai urupanNa do nasida.
Suang songoni do muse di hita rodi nuaeng. Tung mansai borat do mangolu di bagasan haporseaon, sai jotjot do ro angka pangunjunan dohot angka ambat-ambat. Alai songon na didok ni Jesus, unang pola mabiar hita di si, unang ambat-ambat dohot pangunjunan i mambahen hita gabe ndang mamparngoluhon haporseaonta dohot mangulahon tohonan naung dilehon tu hita, ima na parsidohot do pararthon Barita Nauli. Alana tangkas do didok Jesus, sai na urupanNa do hita, gariada didok, asa unang pola hita holsoan mamingkirhon aha nalaho sidohononta, ai sai na mangula do Tondi Porbadia laho mangurupi hita. Lapatanna, molo tutu hitaulahon saluhutnai, sai na urupanni Debata do hita. Amin.

Read More

RENUNGAN HARIAN

RENUNGAN HARIAN BAHASA TOBA:
Kamis 9 Juli 2009
Kej 44:18-21.23b-29;45:1-5 ; Mat 10:7-15

“Alai borhat ma hamu mamaritahon hata on: Nunga songgop harajaon banua ginjang i!” (Mat10:7)

Hata ni Jesus tu angka siseanNa, ima mersuru nasida asa gabe parbarita na mambaritahon harajaon ni Debata nunga jono, ai nunga ro Jesus Sipalua i tu portibi on. Barita on ingkon dipasahat angka sisean i tu saluhut jolma, jala asa lam godang jolma i boi manjalo harajaon ni Debata i. Di tingki Jesus marsuru nasida, dilehon Jesus do bohal di nasida, ima angka na porlu diulaon i. Alai tangkas ma didok Jesus tu nasida, saluhutna i, ingkon dipangke holan laho pararathon haporseaon tu Harajaon ni Debata naung ro tu portibi on, jala ingkon tontong iulahon i di bagasan unduk ni roha jala hot di tohonan tu Debata.
Tugas mambaritahon haroro ni harajaon ni Debata di portibi on marhite Jesus Kristus dipasahat Jesus do tu sude halak Kristen. Sude do hita manorushon nabinahen ni angka sisean na parjoolo i. Disuru Jesus do hita di portibi on laho mambaritahonsa. Aha ma na ingkon sibahenonta? Anggo tutu hita porsea Debata nuga ro tu tonga-tonganta, tontu hita pasahat mai tu angka dongan marhite angka ngolunta. Hita ulahon mai, jumolo marhite pambahenan angka na metemet, unang pola hita pintor marpingkir laho mangulahon angka na bolon, jala hita mulai mai jumolo di tonga-tonga ni rumatanggant be dohot dikarejonta be. Contoh na boi hita bahen: sai tongtong manghaholongi dongan na marsahit, napogos, ndang pasidingkhon angka dongan. HIta ulahon marhite ngolu na tongtong marhaposeaon jala marhaposan tu Debata, marroha pogos di adopan ni angka dongan, jala mamboan ankga silas niroha di ngolu siganup ari. Anggiat marhite ngolunta i, boi diida jala dihaporseai angka dongan bahwa na tutu do Harajaon ni Debatai nunga rot u tonga-tonga ni portibi on. Amin.

Read More

RENUNGAN HARIAN

RENUNGAN HARIAN BAHASA TOBA:
Rabu 8 Juli 2009
Kej 41:55-57 ; Mat 10:1-7

“Alai borhat ma hamu mamaritahon hata on: Nunga songgop harajaon banua ginjang i!” (Mat 10:7)

Molo hita begei taringot tu jou-jou gabe apostel, tontu hita langsung marpingkir tu na 12 apostel naung pinillit ni Debata, muse tontu langsung marpingkir hita tu angka parbiara. Molo didok dijou gabe apostel, ninna rohanta berarti angka parbiara mai. Jala sadarion di Barita Nauli, hita begei Jesus manjou 12 apostel jala marsuru nasida mambaritahon naung jonok harajaon ni Debata, tu nasida dilehon do huaso na porlu dinamangulahon ulaon nasidai.
Sasintongna, dungkon tardidi hita, tohonan na sarupa nunga dilehon tu hita. Sude do hita dijou jala disuru Jesus Kristus laho gabe apostel di parngoluanta siganup ari.Tugas gabe apotel ndang holan gabe ulaon ni angka malim manang angka parbiara, alai sude naung tardidi di bagasan Jesus Kristus. Di nalaho mangulahon tohonan i, nunga dilehon Debata tu hita huaso manang mandat marhite Tondi Porbadia. Alai songon na didok Jesus, ‘Unang hamu laho tu huta ni halak Samaria.” Halak Samaria, ima halak na dianggap ndang marhaporseaon tu Debata, alana ndang pinompar ni halak Jahudi nasida. Jadi boi do lapatan ni i, dinamangulahon tohonan gabe apostel i, unang majolo pintor marpingkir hita laho tu tu huta ni angka na so porsea dope tu Jesus, alai tohonan i hita ulahon majolo i di sekitar humaliang hita mangolu, rupani i di tonga ni rumatangganta. Ai jotjot do di tonga ni rumatangganta pe adong keluarganta na marsahit, ba hita parrohaon i. Alana jotjot do angka na marsahit i ndang holan manghirim di hamalum ni daging, alai holong dohot parrohaon ni dongan manang keluarga. Nuaeng on tung mansai godang do jolma na dirajai tondi-tondi na hodar, rupani i tondi holan manggalului arta, tondi na mamabahen jolma dirajai hepeng, holan mangauhon sangkapna sambing. On ma deba na ingkon hita parrohahon, hita boan nasida asa porsea tu Jesus Kristus, jala diujungna tondi na huodar i ndang be mangarajai nasida. Rupani na asing, sadarion di negaranta diulahon mamillit presiden. Taringot tu son, barane do hita marparange gabe aspotel ni Jesus di naparsidohot mamillit Presidenta? Ruapni i, hita pillit ma sian ias ni rohanta, hita pillit na boi gabe lama pabagakhon parngoluan ni sude jolma di negaranta on, ndang mamillit holan alani kepentinganta sambing. Alai ingot hita ma, saluhutna i asa boi hita ulahon, ingkon ma lam tapajonok tu Jesus naung manjou jala marsuru hita, asa tongtong didongani jala dipargogoi hita, alana tangkas do ulaon on ndang na neang, tung mansai borat do. Alai tung pe borat, porsea hita, raphon jala mardongan Jesus Kristus, sai na tolap do hita mangulahon saluhutnai. Amen.

Read More

RENUNGAN HARIAN

RENUNGAN HARIAN BAHASA TOBA:
Selasa 7 Juli 2009
Kej 32:22-32 ; Mat 9:32-38

“Jadi sai mardalani do Jesus mangaliati angka huta ro di angka sosor, mangajari di angka parguruannasida, manurasihon barita na uli taringot tu Harajaon i; dipamalum do nasa sahit dohot tihasnasida.” ( Mat 9:35 )

Di tingki ngolu ni Jesus di portibi on, sai na mardalani do Jesus mambaritahon harajaon ni Debata, mamboan silasniroha, jala pamalumhon angka na marsahit. Jala didiape Jesus, sai na ro do halak laho manangihon Ibana jala mangido pangurupion sian Jesus. Tangkas ma tutu, Jesus i siboan dame dohot silas ni roha.
Di zaman nuaeng on, godang do jolma manghirim asa manghilala songon na binahen ni Jesus. Godang muse do jolma na sungkun-sungkun, ima na tong dope mangula Jesus di ngolu nuaeng on? Ganggu ni haporseaon ni angka dongan i lam tamba alana mangida ngolu ni angka halak Kristen sonari on tung mansai dao sian aha na diajarhon Jesus Kristus. Molo tung masape songon i, unang pola loja hita laho mangalusi na mangula dope Jesus di ngolu nuaeng on, alai hita alusi mai marhite na mangulahon angka naung diajarhon Jesus Kristus. Hita halak Kristen ma na ingkon manorushon aha naung binahen ni Jesus i. Hakristenonta ingkon ma mamboan silasniroha, mamboan dame didiape jala sadihari pe hita mangolu. Angka dongan ingkon boi manghilala holong ni Jesus tu nasida marhite pambahenanta dohot hadirionta. On ma ngolu hakristenon. Ngolu hakristenon, ndang holan na margareja manang martangiang di Gareja, alai hakristenon i mangolu di ngolu siganup ari.

Read More

RENUNGAN HARIAN

RENUNGAN HARIAN BAHASA TOBA:
Senin 6 Juli 2009
Kej 28: 10-22a ; Mat 9:18-26

“Nanggo pala ulosna hujama, mangolu ma ahu.” (Mat 9:21)

Ngolu na nuaeng tung mansai borat. Sipata alani dihilala paboratho, olo do gabe tubu pingkiran, na olo dope Jesus i manangihon tangianta jala mangurupi jolma? Jala nunga hurang be haporseaon ni jolma tu Jesus di masa nuaeng on. Molo tung mansai borat dihilala sitaonon i, godang do jolma i mangalului pelarian, adong mai pelarian tu minum-minum manang martenggen, adong na holan na muruk, jala ndang saotik na lari tu narkoba. Molo nunga i diulahon, ndang na gabe salpu manang boi sae parsoalan i, alai gabe lam borat jala lam hasusaan no na ro.Sadari on di Barita Nauli hita tangihon, didok adong sada na sangap rot u Jesus mangido asa dipangolu boruna na baru pe mate. Adong muse sahalak boru-boru naung 12 taon marsahit. Tangkas halak na dua on tung manaon sitaonon na tung mansai borat. Dinamangadopi na borat i, nasida nadua ro tu Jesus mangido pangurupion, porsea nasida sai naurupan ni Jesus do nasida, jala toho diurupi Jesus do nasida i. Apalagi si boru-boru i, tung mansai balga haporseaonna tu Jesus. Porsea ibana, ndang pola ingkon dijama Jesus ibana, ai ninna rohana holan dijama ibana ujung ni ulos ni Jesus, sai na malum do ibana. Dibaheni, marhite halak na dua on mangajari hita, asa ro ita tu Jesus tarlumobi di tingki adong sitaonon na borat. Pos rohanta jala porseama hita songon haporseaon tarlumobi boru-boru i, ima holan ro hita di bagasan haporeaon nag ok tu Jesus, sai na tangihononNa do hita, ai dibot Debata do aha na dumenggan di hita jala sai na patupaonNa do angka na denggan di hita.

Read More

RENUNGAN HARIAN

RENUNGAN HARIAN BAHASA TOBA:
Minggu 5 Juli 2009
Yeh 2:2-5; Mzm 123:1-2a,2bcd,3-4; 2Kor 12:7-10; Mrk 6:1-6

“Tung na so marsangap do panurirang ianggo di luat hagodanganna, di angka donganna sabutuha dohot di bagasna.” (Mrk 6:4)

Hea masa di tingki periodisasi Pangulani ni huria manang Vorhanger di sada stasi, adong sahalak ruas na pangalahona, parngoluanna, hapistaranna dohot rohana suman gabe pangula ni huria manang vorhanger. Angka ruas sude mamillit ibana, jala ibana pe ujungna olo gabe pangula ni huria. Alai andorang so dilaporhon tu pastor asa dibahen SK na, muba roha ni angka ruas, alana adong piga-piga halak na mandok, “Ai boha do sahalak vorhanger, ekonomi ni keluargana pe ndang boi disarihon ibana, halak na pogos do ibana. Unang-unang annon sude durung-durung i dibuati ibana.” Adong muse na mandok, “Ise be annon manangihon ibana, ai jolma na pogos do, jala keluargana pe so ringgas margareja.” Alani hata si songoni, gabe sundat dilaporhon tu paroki jala dipangido nasida asa diulanghon muse rapot mamillit vorhanger, jala diusulhon sahalak calon na parhepeng. Pendek sarita, Dewan Pastoral Paroki tetap mandok, “Aha naung tarpillit, ba tarpillitma.” Keputusan on dibahen DPPH, alana diboto do tangkas ai jolma na burju do ibana, tung pe napogos, jala hata nangkin karejo ni piga-piga halak na mansonsothon diri asa gabe vorhanger.
Jala memang songoni do jotjot masa di ngolunta. Halak jotjot holan marnida hamoraon, penampilan do, ndang marnida isi dohot haburjuon ni jolma. Tung mansai mura jolma i mangolohon hata ni dongan, molo dongan i sahalak na mora, parpangkat, alai maol manjalo hata ni dongan molo ibana napogos jala ndang parpangkat, hape na didok nai tung mansai singtong. Gariada muse olo do, ruas i umbiar jala manangihon hata ni sahalak ruas na mora jala marpangkat, daripada manangihon hata di pastor.
Songoni ma na dialami Jesus di tingki mulak Ibana tu huta hatubuanNa. Anggo dimulana, tung mansai tarhalongang do nasida mambegei pangajarion ni Jesus na gok huaso, jala muse nasida bangga membegei aha naung binahen ni Jesus di huta ni halak, ima ulaon hahomion bolon. Alai dung diboto nasida Jesus i sian keluarga ni si Josep na pogos i, gabe ditolak nasida Jesus dohot sude nadiajarhonNa. Alani i, ndang adong ulaon hahomion dibahen Jesus di huta hatubuanNa. Manolak Jesus, berarti menolak harajaon ni Debata. Dibahen i, marhite Barita Nauli sadari on, diajak hita asa tongtong hita marunduk ni roha maradophon angka dongan, tarlumobi di adopan ni Debata. Hita padao ginjang ni roha sian bagas rohanta be, unang mardingkan hita marnida dongan. Molo hita tolak hata manang ulaon na denggan manang nauli napinasahat ni dongan alana ummetmet ibana sian hita, dosmai hita manolak halalasniroha manang habagiaon. Ai angka na denggan manang nauli ndang marnida arta, pangkat manang halak, jala olo do Tondi Porbadia i mangajari hita mahite angka na metmet.

Read More

RENUNGAN HARIAN

RENUNGAN HARIAN BAHASA TOBA:
Sabtu 4 Juli 2009
Kej 27:1-5,15-29 ; Mat 9:14-17

“Boasa marpuasai hami dohot angka Parise; ia angka siseanmi ndang marpuasa?” (Mat 9:14)

Ninna angka dongan sian huria na asing, puasa ni hita halak katolik tung mansai neang, ndang songon puasa ni halak dongan Islam, na ndang mangan manang ndang minum sadari manipat. Pandapot si songon i olo do tarbegei hita, alana jotjot puasa i diida holan taringot ndang mangan manang ndang minum. Hape sasintongna puasa i holan gabe dalan do i laho pajonokhon diri tu Debata. Alana marhite na puasa i, marupaya hita ndang be dirajai sipanganon manang siinumon hita, manang ndang be dirajai haportibion on hita, jala ngolunta hita arahon tu Debata. Jadi sasintongna, ndang soal ndang mangan manang ndang minum, alai lam pajonokhon diri dohot ngolunta tu Debata. Ido lapatan ni marpuasa. Dibahen i ndang adong labana hita marpuasa, anggo so lam jonok hita tu Debata. Jala i do pangantusion dohot nadiulahon angka Parise. Nasida marpuasa, ndang laho pajonokhon diri nasida tu Debata, alai jotjot holan laho mangihuthon aturan manang asa dipuji jolma do nasida. Alani i do nasida ndang mananda Jesus Mesias naung ro tu tonga-tonga nasida, gariada ditolak nasida do ibana. Ansugari tutu nasida marpuasa, tontu sai na tandaon ni nasida do Jesus i Tuhan Mesias naung ro tu tonga-tonga nasida, jala jalo on manang dihaporseai nasida do Jesus i.
Suang songoni pe hita, sai jotjot do hita mangulahon parhuriaon manang peraturan ni huria, ndang sian ias ni rohanta, asa lam jonok hita tu Debata. Alani i do jotjot ndang boi tahilala haroro ni Jesus Tuhanta di bagasan ngolunta si ganup ari, ndang boi hita tanda Jesus i di ngolunta. Dibahen i, hita ulahon ma saluhut ulaon parhuriaon mangan haporseaonta di bagasan ias ni roha, asa boi hita ida jala hita tanda Jesus na sai tongtong ro jala mian di bagasan ngolunta. Amin.

Read More

RENUNGAN HARIAN

RENUNGAN HARIAN BAHASA TOBA:
Jumat 3 Juli 2009
PESTA SANTO THOMAS RASUL
Ef 2:19-22 ; Yoh 20:24-29

“Gabe ninna si Tomas ma mangalusi ibana: Tuhanku jala Debatangku!” (Yoh 20:28)

Jotjot molo adong dongan na maol porsea didok tu ibana, ‘Sahera si Thomas doho!” Sasintongna nabadia si Thomas Apostel na ta pestahon sadari on, ndang na roa pangalaho dohot rohana. Anggo roa pangalaho na tontu ndang sampe dipestahon Gareja i ibana, songon si Judas Iskariot. Molo tung pe jotjot songon na maol ibana porsea, ndang apala alani na roa pangalaho na, alai ibana sahalak jolma na kritis, adong prinsip di ibana, togu di pingkiran dohot pangalaho, alai marunduk jala marlambas ni roha manjalo na sintong jala bagas haporseaonna. Rupani on tarida mai sian hatana na mandok “Tuhanku jala Debatangku!” dung dijalo ibana haporseaon i, ditiop ibana togu jala na olo do ibana mate laho mangihuthon Jesus.
Hape di ngolu nuaeng on, tung mansai mura-mura jolma i meol-meol sian haporseaonna, olo do alani ndang dioloi sangkap ni rohana na so sintong jala maralo dohot angka aturan, pintor mandele jala pinda ugama, olo do alani arta dohot huaso, pintor pindah ugama. Muse godang do halak Kristen alai pangalahona ndang tarida na halak Kristen ibana, jala tong marjogal baut manang jogal rungkhung ndang porsea, hape nunga tangkas ndang sintong na binahenna, jala tung mansai maol mangakui dohot manjalo hata manang pambahenan na sintong ni binahen ni halak, sai tong manganggap dokna do na sintong. Dibahen i, di ari Pesta on, hita tiru ma ngolu ni si Thomas, kritis di ngolu, ndang mura-mura muba manang terpengaruh, tongu di haporseaon jala marlambas ni roha manjalo hata manang na denggan napinasahan ni dongan.

Read More

RENUNGAN HARIAN

RENUNGAN HARIAN BAHASA TOBA:
Kamis 2 Juli 2009
Peringatan Santo Bernardino Realino dkk.
Kej 22:1-19 ; Mat 9:1-8

‘Pos ma roham, ale anaha; nunga sesa dosam!’ (Mat 9:2)

Molo hita jaha panjahaon parjolo jala hita bandinghon dohot Barita Nauli sadarion, ra gabe marpingkhir hita taringot tu roha ni Debata. Di Panjahaon parjolo didok Debata menuru si Abraham mamboan anakna tu sada dolok jala di dolok i dipangido asa si Abraham membunuh’ anak haholongan ni rohana na sasadai naung leleng dipaima ibana. Tontu ganggu do rohani si Abraham manangihon pangidoanni Debata i, jala tontu lungun do rohana. Alai tung pe songoni, tong do diulahon ibana hata ni Debata i tung pe ndang jadi dibunuh ibana anaknai songon na didok ni Debata, jala dipatupa Debata do di si Abrahahm sada anak biru-biru gabe pelean situtungon tu Debata. Diujung ni sarita on, baru pe hita boto aha do lapatan ni Debata marsuru si Abraham, ima Debata laho mangida nasadia balaga ni haporseaon dohot hadaulaton ni si Abraham tu Debata i. Jala memang tangkas ma diboto Debata na tung mansai balga hian haporseaon dohot hadaulaton ni si Abraham tu Debata, na olo do ibana manangihon jala mangulahon hata ni Debata, molo tung pe ingkon hagoan na tung mansai arga hian di ibana. Haporseaon na togu ima muse nadidok di Barita Nauli. Diboan halak do sada na marsahit tu adopan ni Jesus, asa dipamalum ibana. Porsea situtu do halak namboan i, na parholong roha do Jesus jala na olo jala boi do Jesus pamalumhon na marsahit i. Haporseaon na togu i boi diida Jesus, gabe dipamalum Jesus ma na marsahit i.
Marhite angka panjahaon sadari on, tangkas dipabotohon Jesus tu hita, na pinangido ni Debata tu hita ima haporseaon na togu jala daulat tu Debata, ndang haporseaon na alang-alang. Haporseaon i ingkon dipataridahon marhite na olo mangulahon saluhut hata ni Debata. Haporseaontai ingkon ma muse gabe mamboan angka ‘na marsahit’ tu adopan ni Jesus, haporseaontai ingkon gabe mamboan silasniroha tu angka dongan.

Read More

RENUNGAN HARIAN

RENUNGAN HARIAN BAHASA TOBA:
Rabu 1 Juli 2009
Kej 21:5,8-20a ; Mat 8:28-34

‘jadi dung diida, dipangido ma tu ibana, anggiat ditadingkon luatnasida.’

(Mat 8:34)

Angka na jahat sai tong do mangalo jala laho pasidinghon angka na denggan. Ai molo talu hajahaton i, sai na menak ma angka najahati mangulahon ulaonna. Marupaya do na jahat i asa unang mangganggu jala manaluhon nasida. Antar songon i ma nadialami Jesus Kristus. Didok di Barita Nauli sadari on, adong sada huta di Garada na mangalaosi sada dalan na dihabiari angka jolma, ala di si maringanan angka najahat. Ra sengaja do sibolis i , manang parjahat i maringanan di dalan i, asa unang adong jolma na barane masuk tu huta i. Tontu boi dohonon, asa unang masuk na burju i tu huta i, jala menak ma mian parjahat i di huta i. Alai tung pe songon i, Jesus Tuhan Debata na mamboan harajaon ni Debata ndang mabiar mangalaosi dalani, gariada tingki dilaosi Jesus dalan i, ro do sibolis i laho mangambati Jesus, alai dialo Jesus nasida, gariada diusir sian dalan i. Alai tung pe songoni, angka parhutai ro mandapothon Jesus asa ditadinghon Jesus huta nasida. Boasa songoni? Ra, ima ragam ni angka nabinahen ni sibolis laho mangambati haburjuon i, asa tong nasida mangarajai jolma.
Songoni i ma angka na masa di parngoluanta, sai na marragam do nabinahen ni angka sibolis asa unang martobat jolma, asa unang mangulahon angka na denggan jolma. Molo adong rohanta laho mangulahon na denggan, sai tong do adong jala ro angka sibolis mangunjuni hita. Dibahen i manta ma hita, tongtong ma hita togu laho mangulahon angka ne denggan, jala hita pangido ma asa Jesus Kristus mangusir angka siblis sian dirinta sandiri dohot sian parngoluanta.

Read More

RENUNGAN HARIAN

RENUNGAN HARIAN BAHASA TOBA:

Selasa 30 Juni 2009

Kej 19:15-29; Mat 8:23-27

"Na mabiar do hamu hape, hamu parhaporseaon na metmet?" (Mat 8:26)

Galumbang ni ngolu on, ima rupani i sitaonon, hapogoson nunga gabe bagian ni ngolunta di portibi on. Olo do sipata galumbang i ro tompu tu ngolunta, hape ra andorang so ro galumbang i, ngoluntai tung mansai sonang. Dos ma songon na dialami angka apostel i, tingki markapal nasida. Andorang so na masa i, nasida tung mansai sonang, marlasniroha mambegei pangajarion ni Jesus Kristus. Di bagasan las ni roha nasida laho mangihuthon Jesus, marparau tu sada inganan. Hape di tonga laut, tompu ma ro habahaba na balga na mambahen naeng manongnonga kapal ni nasida, jala gabe mabiar situtu ma nasida. alai dung di bagasan habiaron bolon nasida, laho ma nasida tu Jesus na dohot di parau i, mangido pangurupion sian Jesus asa unang saut manongnong nasida, jala diurupi Jesus ma nasida marhite na mamarenta galumbang ni tao i asa menak jala menan situtu ma tao i. Parngoluanta pe jotjot songon i, olo ro tompu parsoalan. Mahite panjahaon sadari on, gabe diajari ma hita ima, molo ro angka si songoni, sae naeng ma nian ro hita tu Jesus Kristus mangido panurupion sian Jesus asa unang manongnong hita di hamateon manang hadosaon. Porsea situtu hita, Jesus Tuhanta sai na manangihon angka alu-alunta tu Ibana, jala Ibana sae na mangulahon angka ulaon hahomion asa unang mago jala mate hita. Porsea do hita tu Jesus na boi mangurupi hita malua sian angka galumbang manang habahaba ni ngulonta on? Sai na ro do hita mangido pangurupion sian Jesus?

Read More

RENUNGAN HARIAN

RENUNGAN HARIAN BAHASA TOBA:

Senin 29 Juni 2009
HARI RAYA ST. PETRUS DAN ST. PAULUS, RASUL

Kis 12:1-11; 2Tim 4:6-8,17-18; Mat 16:13-19

" Kristus (Messias), Raja na pinarbagabaga i do Ho, Anak ni Debata na mangolu!" (Mat 16:16 )

Sadari on hita rayahon do ari Rea Apostel Petrus dohot Paulus, jala sadari on huhut mai manutup Jubileum taon Paulus. Ra sungkun-sungkun do rohanta alana boasa holan Junileum Taon Paulus? Hape tangkas do sadari on ari rea apostel Paulus jala tangkas do ise si Petrus i, ima apostel na gabe ulu ni angka apostel dohot huria napinajongjong ni Jesus Kristus. Aha alusna boasa songon i? On ndang gabe diskusinta di son. Alai tangkas do hita boto, aha alus ni si Petrus di tingki di sungkun Jesus angka apostel i, ise do Ibana. Alus ni si Petrus mandok, Jesus i Kristus (Messias), Raja na pinarbagabaga i do, Anak ni Debata na mangolu. Haporseaon on ma na dihaporseai jala na diparngoluhon si Paulus.

Anggo dimulana memang si Paulus na mulana margoar si Saulus, ndang sada sian sisean ni Jesus, gariada ibana halak na marsogo ni roha tu angka sisean ni Kristus. Alai di ujungna martobat ibana, jala digantima goarna gabe si Paulus. Tung martobat ibana, aha nadidok ni si Petrus nangkin, ido na diparngoluhon ibana. Haporseaon ni si Paulus, n Jesus i Kristus Mesias dipataridahon ibana marhite ngoluna jala dibaritahon ibana. Dungkon martobat ibana, ibana gabe mambaritahon Jesus Tuhan Mesia. Songoni ma nian halak kristen. Molo tutu do nasida sahalak kristen na porsea Jesus i Tuhan mesias, tontu hotma di haporsaon jala parsidohot nasida mambaritahonsa marhite parngoluan na denggan, panghataion jala gabe ma nian parsidohot mambaritahon ise do Jesus i. Hita saluhutna angka na prsea tu Jesus Kristus, hita tiru ma naung binahen ni si Paulus, ima mambaritahon Jesus i di parngoluanta siganup ari. Hita ma nuaeng na gabe si Paulus naimbaru.

Read More