RENUNGAN HARIAN

RENUNGAN HARIAN BAHASA TOBA :

Minggu, 24 mei 2009: Minggu Paskah VII
Ari Komunikasi Saportibi

Ulaon 1:15-17,20a,20c-26; 1Joh 4:11-16; Yoh 17:11b-19
“Nunga hulehon hatami tu nasida; dihosomi portibi on do nasida, ai ndang sian portibi on nasida, songon Ahu na so sian portibi on.”

Sada sian godang namambahen Jesus sukses mangulahon tohonan na nilehon Debata Ama tu ibana, ima KOMUNIKASI. Jesus Kristus sai tongtong do manjalin komunikasi dohot Debata Ama, rupani i marhite na jotjot, gariada ganup tingki ibana martangiang. Dibagasan kumonukasiNa dohot Debata Ama, dipasahat ibana do sude nadiulaNa, angka siseanNa, jala marhite komunikasi I, muse dipatogu Debata imaNa. Suang songoni muse, Jesus menjalin komunikasi na tung mansai bagak dohot jolma i di na pasahathon Barita Nauli. Molo hita jaha di Buku Nabadia, suang songoni molo hita tonton film Jesus, tangkas tarida tung mansai malo hian Jesus markomunikasi pasahathon Barita Nauli. Ra ndang adong pakar komunikasi na boi manandingi Jesus di portibion, alana tangkas Jesus tung mansai malo manghatai, hatana gok huaso, jala aha na pinasahatNa tarida diparngoluanNa, pokkokna sampurna. Dikomunikasi i pe, Jesus mamangke bahasa ni jolma sesuai dohot pemirsah, jadi mura diantusi namambegei, ndang hera angka pamimpin nueng on, antar songon na pajogo-jagohon, jala asa dietong halak jago sai dipangkeima istilah-istilah langit na so diantusi jolma. Asing ni i muse, dipangke Jesus do sarana na adong di tingki i, sesuai dohot dunia di tingki i dohot na tinanda di namambegei. Ah, memang tung mansai malo hian Jesus markomunikasi dinapasahathon Barita Nauli, jala memang toho ma ibana sahalak Pakar Komunikasi, ndang adong tandinganna.
Sadari on ari Minggu Paskah pa pituhon huhut mai ditaringoti Ari Komunikai saportibi. Marhite Ari Komunikasi on, tontu hita halak Kristen dipaingot di tohonan naung ta jalo, ima pasahathon Barita Nauli. Di napasahathon Barita Nauli i, dipaingot hita asa marsiajar sian Jesus boha do markomunikasi na denggan di napasahathon Barita Nauli. Jumolo sahali na ingkon taulahon ima, manjalin komunikasi na denggan dohot Tuhan Debatanta, hita bina ma jumolo hubungan na bagak dohot Debata, baru pe sian i ma hita markomunikasi dohot jolma dinapasahathon Barita Nauli, songon naung binahen di Jesus Kristus. Di ari Komunikasi saportibi on, na umporlu taparrohahon ima hita pangke ma angka sarana komunkasi nuaeng on laho pasahathon Barita Nauli. Rupani i, nueng on tontu nunga sude punasa HP, gariada angka gellengta pe ra nunga sude puna HP. Alai boasa dang adong natua-tua, ganup ari, pagi manang sore mangirim SMS na marisi hata ni Tuhan manang Barita Nauli tu angka ianakhonna? Adong do kira-kira namangulahon songon i? Boi do ra muse, di tingki ari Minggu, hita mangeSMS donganta na hurang ringgas marminggu, asa ro marminggu. Godang dope na asing na boi tabahen marhite HP laho pararathon Barita Nauli. Ra ndang adong na mangulahon i, alana marpingkir rugi , mambahen habis pulsa. Hape sadia ma pulsa i dibandinghon molo adong dongan na martobat?
Rupani na asing na umbalga muse, godang do ra halak Kristen na mora. Alai boasa ndang adong dope namora na barane mambahen Stasiun TV manang Radio na khusus laho sarana pararathon Barita Nauli? Adongdo hira-hira na hea marpingkir laho mambahen i? Alana sasintongna, godang dope halak Kristen, songoni halak Katolik na hurang mangantusi haporseaon Kristen, siala memang ndang adong na mangajari nasida. Hape molo adong stasiun TV dohot Radio khusus, tontu boi ma nasida diajari tung pe ndang pola ingkon mangutus guru agama tu inganan nasida be, alana boi dijangkau sude angka umat.
Songon di Dairi-Sidikalang, adong do radio ni halak Kristen (GMII). Hami hea do marnipi laho mambahen Radio Khusus Katolik, alana ruas Katolik godang do jala marserak di Dairi na tung mansai bolak, gariada sahat do tu Pak-pak Bharat dohot tu Aceh Selatan. Marningot bolak ni na ingkon dihobasi Huria, Huria i ndang tolap laho mangajari sudena asa lam malo ruas katolik i di haporseaon katolik. Alai alani bolakna jala hurang tenaga, tung mansai godang do ruas Katolik i na maoto dihaporseaon Kristen manang Katolik, gabe jotjot do di nasida sarupa do sude agama i. Alani i, godang do na mura-mura pinda agama, tontu alana hurang diantusi agamana. Nipi name hian, ansugari adong hepeng laho mambahen Radio Katolik, tondu lam mura ma mangajari umat i, jala lam malo ma naside. Alai on holan nipi nama haroa, alana nipi on nunga marpiga-piga taon, alai sampe saonari ndang marna dungo dope nipi i.

Senin, 25 Mei 2009: Minggu Paskah VII
Ulaon 19:1-8; Joh 16:29-33
“Asa mardame hamu di bagasan Ahu, umbahen na huhatahon angka i tu hamu. Haporsuhon do jambarmuna di portibi on; alai pos ma rohamuna: Nunga talu hubahen portibi on.”

Godang do ragam parngoluan ni angka dongan pangihut ni Jesus Kristus. Rupani i, godang do dongan na pogos i, marsidalianhon hapogosanna asa unang pola marminggu di ari Minggu manang mamparngoluhon haporseaonna, jotjot ninna sidalianna, “Boha ma bahenon pastor di namangalului ngolu on, na ingkon do tong karejo di ari Minggu!” Adong muse na asing mandok, “Ansugari rajin ahu margareja pastor, na boi lehonon ni pastor mangan keluargakhu?” Hape molo ulaon paradaton di ari Minggu, neang langkana laho maninggalhon karejona, songoni muse molo ndang kareja di ari Minggu tong do ndang laho tu gareja, alai laho tu lapo tuak do, ninna buang suntuk.
Adong muse pangalaho na asing, ima namora tung mansai rajin margareja, aktif di sude kegiatan huria. Jala nasida jotjot gabe silehon poda taringot haporseaon, rupani i ninna, “Di hamu angka dongan sahaporseaon, ingkon ma hita marhaporseaon tu Jesus Kristus, ai pardenggan basa do ibana, sai napatupaonna do na porlu di hita, unang pola mabiar hita aha allangonta marsogot…” Umbegesai ninna dongan mangalusi, “Kesset ho, alana na mora do ho binahenna didok ho songoni, suba majolo molo pogos ho songon hami, barane dope ho mandok songon i? Adong tutu toho ni sungkun-sungkun on. Alana olo do ala naung tupa sude di ibana mambahen burju jala aktif ibana di sude kegiatan gareja, ai ndang pola mirdong be ibana mamingkirhon siallangonna sogot, ai holan martahuok manuk manogoti nunga ro hepengna.
Dibahen i, boha pe ragam ni ngolu ni halak Kristen alai sai tongtong ma hita hot dihaporseaonta na ibana do Tuhan Debatanta. Porsea do hita di si?

Selasa, 26 Mei 2009: Minggu Paskah VII
Ulaon 20:17-27; Joh 17:1-11a
“Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna.”

Hea sahali adong ro ruas lingkungan tu pastoran manjumpangi pastor jala ninna ma, “Pastor ai ruas katolik do hami, sian lingkungan X. Omak name nunga marujung ngolu nantoari, jadi maksud nami asa misa sogot botari di jabu.” Ninna pastor i mangalusi, “Ai nunga dipabotohon hamu tu ketua lingkungan muna?’ Dialusi ruas i ma, “Nunga hu sms hami nangking pastor, lalai ndang dibalas dope, jala hami memang jarang hian marlingkungan dohot margareja.” Memang sian laporan ni pangurus lingkungan, nasida nunga marpiga taon na sakeluarga ndang margareja dohot marlingkungan. Dungi ninna pastor ma mangalusi, “Anggo songon i amang, boasa haroa pola dipangido hamu misa arwah marsogot, ai so hea hamu aktif di huria i, jala porsea do haroa hamu di tangiang ni huria i?” Ninna ibana ma muse mangalusi, “Porsea do hami pastor, jala hupangido hami misa di jabu, asa tenang borhat natua-tua i, jala dijanghon Debata natua-tua name i di harajaon Surgo, ngolu na manontong.”
Antar songoni ma na masa dihurianta, didok porsea alai ndang dipataridahon di parngoluan, jala hangoluan na manontong i dipingkir holan tingki dung mate sajo. Alani i do, godang halak dung matua pe mulai ringgas margareja, alana laho jonok nama mate, dohot pingkiran annon molo mate asa dihobasi huria, asa unang mate hera somarugama alias sipele begu, jala asa manjalo hangoluan na seleleng ni lelengna. Hape didok Jesus nangkin, “Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna.” Lapatanna, di tingki mangolu dope hita di portibi on, nunga tahilala hangoluan na saleleng ni lelengna i, ima marhite na manghaporseai Jesus Kristus, ndang holan annon dungkon mate. Haporseaon na tutu tu Jesus Kristus, ido halalas ni roha bolon, jala halalas ni roha bolon i dipagonop dungkon mate hita, di si ma marsaor hita dohot Jesus Kristus di surgo, inganan na tung mansai sonang, jala ndang mate me hita. Dibahen i, ndang toho molo didok hangoluan na saleleng ni lelengnai holan tingki dung mate, jala haporseaon i diparngoluhon holan tingki laho mate. Jadi pinsan mangolu dope hita, hita parngoluhon ma haporseaonta tu Jesus Kristus.

Rabu, 27 Mei 2009: Minggu Paskah VII
Ulaon 20:28-38; Joh 17:11b-19
“Ndang apala hupangido, taitonmu nasida sian portibi on; alai naeng ma ramotanmu nasida maralohon na jahat i.”

Bagak nai antong holong dohot tangiang ni Jesus i tu hita. Nunga dibuat ibana hita sian portibi on dinamanjadihon hita gabe anak dohot boruNa, dungi diradoti, jala dipasahat do hita tu Debata ama jala ditangianghon do hita asa unang dibuat parjahat hita. Tangkas muse, ndang na taitonNa hita sian portibi on, alai diramoti do hita, asa unang dipatalu hajahaton na di portibi on hita. Tung mansai hirim roha ni Jesus Kristus asa sai tongtong hita raphon ibana.
Ra ninna rohanta be do, “Anggo tutu do holong roha ni Jesus tu hita, jala manghirim ibana asa hita sai tongtong raphon ibana di parngoluan di portibi on, suang songoni di surgo, boasa ma ndang taitonna hita sian portibi on, boasa ma ndang diagohon ibana na jahat i sian portibi on?
Tung mansai holong situtu do rohani Jesus tu hita, alani holongNa do binahen na dipangke hita laho pararathon Barita Nauli, disuru hita manjamitahon harajaon ni Debata di portibi on, asa lam tubagakna ngolu ni jolma di portibion, asa lam tugodangna jolma na porsea, jala masuk tu surgo. Ise ma haroa jolma i, binahen na diparbadia Debata, jala aha ma haroa pangkat ni jolma i, binahenna dipangke Debata laho manjamitahon Barita Nauli? Holan ala ni holong ni Debata sambing do, jala holong ni Debata sai tongtong mandongani hita, asa tolap hita mangulahon tohonan i, jala asa unang dibuat parjahat i hita. Dibahen i, taingot ma, nunga dibuat Debata hita sian portibion, dipabadia Debata hita jala disuru hita tu tonga-tonga ni portibi on laho parsidohot pararathon Barita Nauli, asa lam tu godangna jolma na masuk surgo.

Kamis 28 Mei 2009; Minggu Paskah VII
Ulaon 22:30;23:6-11; Joh 17:20-26
“Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu.”

Hea sahali sahalak ruas marsarita, ninna ma, “Adong hea naro tu jabu pastor, nasida marsarita taringot tu Jesus Kristus, mamboan ajaran ni Gareja nasida. Ninna nasida aha nadiajarhon ni huria nasida i do na sintong, na doshon ajaran ni Jesus Kristus, rupani i ninna, pandidion na sah alkitabiah ima ingkon disornophon tu aek, ndang sae holan ditirishon aek tu simajujung.” Jadi husungkun ma nasida, “Dia do intina, na ro hamu tu bagas name on, ndang na laho mamboan haporseaon tu Jesus Kristus i do?” Alus ni nasida, “Ido, asa porsea hamu tu Jesus Kristus.” Dungi ningku ma mangalusi, “Bah, ai ndang diida hamu naung gantung silang di bagas nami on? Sian silang i kan nunga boi tangkas di hamu bahwa hami nunga porsea tu Jesus Kristus. Asing do haroa Jesus nabinoan muna i dohot na tarsilang an? Anggo tutu do hamu laho mambaritahon Jesus Kristus, unang be ro hamu tu jamu name on, ai nunga porsea hami tu Jesus Kristus, alai laho ma hamu tu jamu ni angka dongan na so Kristen dope, di si ma baritahon hamu Jesus i, asa porsea nasida. Anggo ro do hamu tu bagas ni angka naung porsea tu Jesus Kristus, ndang na mambaritahon Jesus i hamu, alai manarbuti huriani halak, manggaori, jala ndang tutu Jesus dibinaritahonon muna alai huria munai do. Sarita i, ra nunga hea ra tabegei, jala adong do masa i, seakan-akan marasing-asing Jesus i.
Nangkin di Barita Nauli Jesus Kristus martangiang asa sada angka sisenNa i. Hape sian sarita i halak Kristen sandiri godang na momansa-monsa Kristen i. Godang halak Kristen ndang gabe sipatupa hasadaon, alai sibahen parsalisian, alani ginjang ni rohana na mandok ibana do na sintong, halak an ndang sintong. Sintong manang daong, tarida doi sian parbuena. Dibahen i, naeng ma nian hita halak Kristen gabe sipatupa hasadaon di rumah tangga, di huria dohot di masyarakat. Molo tutu do sangkap ni Debata na talului dohot na taulahon , tontu hasadaon do tapatupa. Memang laho pasadahon Gareja naung godang gabe sada Gareja, ndang mungkin be, alai pinomat nian sada di bagasan Jesus Kristus, ndang marsiparoa-roaan dohot ndang pabola-bolahon huria i ima marhite namanarbuti ruas sian huria na asing naung hot sada.

Jumat 29 Mei 2009: Minggu Paskah VII
Ulaon 25:13-21; Joh 21:15-19
“Olo, Tuhan; diboto Ho do holong ni rohangku di Ho!”

Somalna di tingki laho periodisasi vorhanger manang angka pangurus Gereja, dibahen ma angka criteriana. Rupani criteria i, halak i ingkon sehat jasmani dohot rohani, ingkon nunga tardidi pinomat nunga 2 taon, ringgas di partangiangan lingkungan, stasi manang parmingguan ari Minggu. Ngoluna ingkon burju di keluarga, di lingkungan dohot di masyarakat. Halak i ingkon malo manghatai. Adong muse do na mamillit pangurus asing sian criteria na di ginjang, alasanna anggiat marhite na gabe pangurus i ibana, ibana gabe ringgas margareja.
Sude kriteria na di ginjang i tung mansai bagak. Alai adong na dihalupahon songon na nidok ni Jesus tu si Petrus, ima ingkon manghaholongi Jesus Kristus di ginjang ni saluhutna. ido naumporlu na pinangido ni Jesus Kristus. Alana anggo so adong holong na songoni, saluhut kriteria i ndang marlapatan. Holong na bolon tu Jesus Kristus, di ginjang ni saluhutna na adong di portibi on, ido na gabe syarat na pinagido di sude angka siseanni Jesus Kristus. Dibahen i, hita sungkun ma dirinta, “Nunga huhaholongi Jesus Kristus di ginjang ni saluhutna na di portibi on?”

Sabtu 30 Mei 2009; Minggu Paskah VII
Ulaon 28:16-20,30-31; Joh 21:20-25
“Molo na lomo rohangku, naeng mian ibana, paima ro Ahu, ndang na ro di ho i; asal diihuthon ho Ahu!”

Si Johannes na manurat injil Johannes on patolhashon tu hita, ima aha na disurat di dibukkunaon, sudena tung mansai toho, tung pe ndang boi sude nabinahen ni Jesus disurathon di sada buku, alana tung mansai godang naung binahen ni Jesus, jala saluhutnai sada hahomion bolon na sotarantusan hita. Memang sada hahomion bolon do i, songon na didok ni angka namalu, “Anggo boi do sude tarantusan ngolu dohot na binahen ni Jesus, berarti dosma ibana dohot hita jolma, marhuabe tahaporseai ibana.” Lapatan ni hata, laho mandok porsea ma hita tu ibana jala hita ihuthon ma ibana, songon na nidok ni Jesus tu si Petrus, “iihuthon ma Ahu!” Hita ihuthon ma Ibana dohot sude na nidokNa, unang pola suda tingkinta laho mamingkirhon boha annon hasilna, ditangihon jolma do manang daong. Hita pahotma haporseaonta tu ibana, ai patupaonna do angka na porlu dihita.

Minggu 31 Mei 2009: Ari Rea Pentekosta
Ulaon 2:1-11; Gal 5:16-25; Joh 15:26-27; 16:12-15
“Alai dung ro Tondi hasintongan na nidok ondeng, togihonon ni i do hamu tubagasan nasa hasintongan.”

Di Ari Rea Pentekosta on, tu hita dipapatar ma muse hagogoon ni Tondi Porbadia na songgop tu angka Apostel. Tondi Porbadia i, ima Tondi Nabadia na dijanjihon Jesus sandiri andorang so borhat ibana mulak tu surgo. Tondi i tung mansai manguba angka apostel. Anggo di mulana nasida tung mansai mabiar manorushon Barita Nauli, mangulahon tona ni Jesus Kristus tu nasida, alai dung songgop Tondi Porbadia tu Nasida, nasida gabe barane, jala marhite Tondi Porbadia, sude jolma mangantusi aha napisahat ni angka apostel. Jadi Tondi i, ndang holan manguba angka apostel, alai dohot do pauba angka na umbegesa jamita ni angka apostel. Tondi Porbadia naung jinalo ni angka Apostel nunga dilehon tu hita di tingki pandidion jala dipagok di tingki Krisma hita. Nunga mangula Tondi i di bagasan ngolunta?
Taringot tu si, adong do halak Kristen na mandok, tandana sahalak Kristen i nunga digohi Tondi porbadia, jala nunga mangula Tondi porbadia i di diri nasida, ima molo boi nasida marhata roh. Hurang do tohona pandapothon, alana songon na tarsurat di Galatia 5:22-24 didok, “Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. Ndang maralo patik dompak angka sisongon i. Alai angka na ginomgoman ni Kristus Jesus, diparsilangkon do dagingna rap dohot angka hisaphisap dohot sangkapsangkap.”
Jadi tung mansai tangkas di hita, Tondi Porbadia i puba angka apostel, mambahen nasida barane majamitahon harajaon ni Debata. Tondi Porbadia dohot parbuena na mangolu di bagasan diri ni angka Apostel mambahen angka na mambegei jamita nasida gabe porsea tu debata. Saonari tasungkun ma jolo dirinta, “Nunga mangolu jala mangula Tondi Porbadia i di bagasan dirinta be? Anggo tutu nunga mangolu Tondi Porbadia naung ta jalo i di bagasan dirinta, nunga lam prosea angka dongan na pujumpang dohot hita?

Posted in: Renungan Harian