RENUNGAN HARIAN BAHASA TOBA:
Selasa 23 Juni 2009
Kej 13: 2.5-18 Mat 7: 6.12-14
" Saluhut na pinangido ni rohamu, sibahenon ni halak tu hamu, i ma bahen hamu tu nasida!” (Mat 7:12)
Sude do jolma manghirim asa dihaholongi halak ibana, asa angka na denggan dibahen jolma tu ibana. Ndang adong jolma na marlomo ni roha ndang dihaholongi dongan dirina, ndang adong dongan na marlomo ni roha dibahen jolma na so denggan di ibana. Alai sipata jolma i holan mangogohon pangidoan ni rohana sambing. Sai naeng dihaholongi halak ibana, alai ibana ndang manghaholongi donganna, sai naeng dihormati, alai ibana sandiri ndang manghormati donganna. On ma nadidok roha egois.
Boasa songoni? Alana memang ndang na mura manghaholongi dongan, ndang na mura mambahen na denggan tu dongan. Molo barane hita mangulahon na denggan jala manghaholongi dongan, berarti barane ma hita ndang holan mamingkirhon dirinta sandiri. Roha songon i berarti roha olo markorban. Hape songon na didok Jesus sadari on di Barita Nauli, di namangulahon holong dohot na denggan tu dongan, ido dalan laho tu habagiaon. Alai on tung mansai borat, songon mardalan di dalan na sompit. Didok Jesus nangkin, dalan tu hangoluan i dos songon mardalan sian dalan na sompit, alana memang godang ambat-ambat, jala maol. Alai mardalan tu hamatean i, songon mardalan sian dalan na lumbang, alana godang tudos-tudos sitiruon, jala ndang pola godang ambat-ambat. Dia ma sipillitonta? Jala tangkas ma hita ingot hata ni Jesus nangkin, asa jumpangta na denggan di hita, ba hita ulahonma angka na denggan, tung pe mangulahon i songon na mardalan di dalan na sompit hita.
0 komentar:
Posting Komentar