RENUNGAN HARIAN BAHASA TOBA:
Senin 22 Juni 2009
Kej 12: 1-9 Mat 7: 1-5
“E ho pangansi, jumolo ma umpat tiang i sian matami; dung pe i, asa pingkiranmu, manang beha pangumpatmu di silbaksilbak na di mata ni donganmi!” (Mat 7:5)
Najolo manang mungkin ro nuaeng adong dope hita ida di bona pasogit, ima molo nunga antar siang, angka ina-ina hundul di jolo ni jabu ni sahalak, jala olo do nasida sambil marsihut sambil manghata-hatai. Aha ma nadihatai nasida? Somalna manghatahon jolma manang nahurang tarlumobi di sahalak dongan. Memang nunga songoni bangko ni jolma naueng on, tung mansai mura marnida dohot manghatahon angka hahurangan ni dongan. Molo taetong di golu on, ra ngumodang do jumpangonta angka dongan na manghatahon hahurangan ni halak daripada na manghatahon haburjuon ni sahalak dongan. Gariada ra, nunga tangkas hita boto na denggan do nabihen ni dongan i, lai i ndang na laho hita hatahon i tu halak, Alana mungkin mangimburu hita, Alana ninna rohanta hit ape boi jala lobi si songoni. Ai ninna roha ni dongan, molo hita hatahon halobion ni dongan, sahira turun gengsinta, manang mabiar hita dirimpu jolma hita ndang boi songoni. Alan i do jot-jot hita mangida jala manghatahon hahurangan ni dongan, ninna rohanta aa diboto jolma i bahwa dirinta ndang songoni, jolma na burju. Hape sasintongna, molo hita hata-hatahon hahurangan ni dongan, dos doi hita pabotohon hahuranganta, ima lomo rohanta manggosip. Alana dungkon i, mabiar ma jolma i mardongan dohot hita, ai mabiar ma ibana anon hitagosiphon muse.
Sadari on didok Debata tu hita, asa unang neang-neang hita marnida jala manghata-hatahon hahurangan ni dongan. Ai ndang adong hita na malua sian hahurangan. Dipangido Debata hita, tumangon ma hita mangida hahuranganta, jala dungkon i barane hita padengganhon diri, pabagakhon ngolunta asa unang lam ganda hahuranganta i.
0 komentar:
Posting Komentar