RENUNGAN HARIAN

RENUNGAN HARIAN BAHASA TOBA :

Selasa 2 Juni 2009
Tb 2:9-14; Mrk 12:13-17

“Lehon hamu ma tu Kesar na sian Kesar i, jala tu Debata na sian Debata! Jadi longang ma rohanasida mida Ibana!”

Di Gereja na di Sumatera Utara, adong do masa nadidok angka iuran tu Gareja, rupani i, ima Dana Mandiri Paroki. Lapatanna, sada dalan laho mangajak sude angka ruas asa patuduhon parsidohot bertanggungjawab di ngolu ni Huria i. DMP di pangke Gareja i laho gabe dana operasional paroki. Alai somalna, DMP i ndang dipaksahon Gareja, ndang hea dituntut manang dipecat ruas i molo so digarar.
Alai hea ma sahali di tingki marhuria, adong ma ruas na mandok, “Boasa pajak tu Gareja umbalga sian pajak tu Negara?” Pajak na didokna i, ima DMP inon. Umbegesai i, mengkel sumbing ma pangulani huria na mambegei. Dongan na manungkun i, mangida jala mangantusi DMP i gabe songon pajak tu Gareja. Hape nian DMP i nang songon pajak tu Gareja, jala molo dietong sian godangna, ndang pola sadia.
Songon i ma haroa na masa di tonga-tonga ni Huria di nuaeng on. Alana tangkas do di hita, Gareja i do gabe punguan na pinajongjong ni Jesus Kristus, tanda ni harajaonNa jala Ibana do na gabe ulu ni Gareja i. Gareja i manorushon haluaon na manontong naung binoan ni Jesus Kristus marhite na mangajari, mangatur ngolu ni ruas asa doshon sangkap ni Debata, jala Gareja i pabadiahon ngolu ni ruas i. Alai asa boi Gareja i padalhon ulaonna, tontu polru adong dukungan sian ruas i, jala dukungan ni ruas i gabe sada dalan na laho paingothon ruas i asa tong mangalehon tingki dohot ngoluna tu partondion, haporseaon, asa unang tarlalap jala suda sude tingkina di ngolu hajolmaon mangan haportibi on.
Hape na masa molo di ulaon Gareja manang parhuriaon tung mansai borat hian ruas i mangulahonsa, jotjot marungut-ungut molo adong permohonan ni Gareja di sada ulaon. Alai molo taida di parngoluan siganup ari, tung mansai mura jolma i pasudahon tingki dohot hepengna laho di hajolmaon, rupan i, ima dingolu paradaton, di ngolu na mangalului hasonangan (marpoyah-poyah) dohot na asing. Godang do ruas i na molo di ulaon hria mandok, ndang sanga tingkina alana sibuk karejo, alai hape anggo tu lapo tuak dohot tu paradaton ganup ari sanga andigan pe. Songon i muse molo adong iuran tu Gareja, ninna ma ‘ndang adong hepeng, nunga sude laho di ngolu, jala na pogos do hami.” Hape sigaret tong dipulpul ganup ari, ndang adong moro dohot hasoanna, tuak disobur ganup ari di lapo tuak. Boasa masa songon i?
Ra ala hurang dipahorseai aha naung didok ni Jesus sadari on, ima naung dilehon Debata tu ibana ngolu, dipasu-pasu jala diramoti Debata ibana. Tontu molo on tahaporseai, hita pe barane mandok mauliate tu Debata na gabe hak ni Debata. Memang na pinangido ni Debata ndang hepeng, arta, alai ngolu na denggan doshon sangkap ni Debata. Alai molo na met-met i, ima pelean i sajo hita ndang boi, apalagi ma ngolunta na doshon sangkap ni Deabta songon na pinangido ni Debata tu hita? Boa hita, songon dia do pangoluanta siganup ari?

Posted in: Renungan Harian