RENUNGAN HARIAN

RENUNGAN HARIAN BAHASA TOBA:

Minggu 28 Juni 2009
Keb 1:13-15;2:23-24; 2Kor 8:7,9,13-15; Mrk 5:21-43 (Mrk 5:21-14,35b-43)

“Dipalua haporseaonmi do ho, inang! Mardame ma ho laho! Sai malua ma ho sian parniaeanmi!” (Mark 5:34)

Barita Nauli sadari on tung mansai mambahen tarhalongang hita, alana dipapatar tu hita tung mansai balga hian parbue ni haporseaon, ima haporseaon ni sada ama na margoar Yairus. Si yairus mangido asa boru na namarsahit jala naeng mate asa di pamalum Jesus. Dung sahat Jesus tu jabu ni si Yairus, ai nunga mate jumpang Yesus boru ni si Yairus i, alai alani balga ni haporseaon ni si Yairus na mangido tu Jesus, gabe dipangolu Jesus borunai sian hamatean. Alai andorang so i, di tongan dalan, adong sada boru-boru naung leleng marsahit. Boru-boru i tung mansai balga haporseaonna, alana porsea ibana holan manjama abit ni Jesus i, nunga boi pamalumhon ibana, jala toho malum ma ibana dung dijama ibana abit ni Jesus, hape nungga tung mansai leleng ibana marsahit. Sian dua halak na marhaporseaon on tangkas di pabotohon tu hita, balgani haporseaon tu Jesus marparbuehon hahipason, paluahon hita sian sitaonon. Alai porlu hita ingot, jot-jot ninna jolma , ulaon na bolon n binahen ni Jesus tu hita manang tu sasahalak patubuhon haporseaon tu ibana. Hata on ndang sintong. Na sintong ima, haporseaon na bolon tu Jesus marparbuehon ulaon na bolon. Ndang alani naung binahen Jesus ulaon bolon, hahomion bolon asa porsea hita tu Ibana, alai hita porsea tu Jesus alana Ibana do Tuhan Debata. Porsea do hita, Jesus Tuhan Debata, jala manghaporseai ibana, ido paluahon hita sian hamatean?

Read More

RENUNGAN HARIAN

RENUNGAN HARIAN BAHASA TOBA:

Sabtu 27 Juni 2009
Kej 18:1-15 ; Mat 8:5-17

“Ale Tuhan, na hurang tama do ahu, tung degeonmu jabungku; dok ma hata sisandok, asa hipas naposongki!” (Mat 8:8)

Tung mansai burju hian induk soldadu na hita begei dibarita nauli i. Ibana ro tu Jesus mangelek asa dipamalum Jesus naposona (pambantuna). Sahalak tuan mangido tu naposona. Angkup ni i muse, induk ni soldadu i parhaporseaon nabalga, alana ibana marunduk ni roha, na mandok pardosa do ibana, dibahen i ndang tama Jesus na madai o ro mandege jabuna, jala didok ibana na porsea holan hata sambaing pe didok Jesus, sai na hipas do naposonai.
Asing do pangalaho ni induk ni soladadu i dohot pangalaho na mangolu di nuaeng on. Godang jolma i holan mamingkirhon dirina sandiri, molo tung pe martangiang, ai holan martangiang di Ibana sandiri manang holan mangido di ibana sandiri. Muse, ise ma haroa jolma na olo mangido pasu-pasu tu naposona? Somalna sahalak tuan, manang namora holan mamarenta naposona do.
Marhite nabinahen ni induk soldadu i didok tu hita, asa hita unang holan mamingkirhon dirinta sandiri, unang holan martangiang mangido pasu-pasu holan di hita sandiri. Tung mansai godang dope jolma na marsahit, na metmet di tonga-tonga ni ngolunta. Olo do hita mengurupi dohot martangiang mangido tu Jesus asa dipasu-pasu nasida? Porseama hita, pambahenan na dengaan dohot tangiangta tu nasida, tontu do marlapatan molo hita ulahon di bagasan haporseaon dohot ias ni roha.

Read More

RENUNGAN HARIAN

RENUNGAN HARIAN BAHASA TOBA:

Jumat 26 Juni 2009
Kej 17:1.9010,15-22; Mat 8:1-4

"Na olo do Ahu; ias ma ho! Jadi pintor malum ma hulitna i.” (Mat 8:3b)

Sude hita, tontu hea do marsahit. Di tingki marasahit i, hita upayahon do marobat tu dokter. Alai jotjot molo ndang marna malum dope sahit i, olo do tubu pingkiran, bahwa sahit i nabinahen ni jolma. Gariada godang dope jolma nuaeng on, molo ro sahit pintor laho tu namalu manang datu, pintur dirimpu na binahen ni jolma. Tung mansai godang dope dongan na songoni pingkiranna. Alani i ma haroa binahenna godang ro jolma tu Siponari na dibaritahon boi pamalumhon sude sahit molo manginum aek naung didaishon dohot batu najumpangna di tombak-tombak. Asing ni i muse, di zaman modern on godang do jolma na mambahen barita na mandok boi pamalumhon sude sahit. Bah hebatnai antong.
Alai di Barita Nauli na hita bege sadari on, sahalak na marsahit huliton ro tu Jesus. Ibana porsea bahwa Jesus boi pamalumhon Ibana, dibahen i do dipangido Ibana jala didok, : Ale Tuhan, molo na olo Ho, tarpaias Ho do ahu.” Porsea Ibana jala mangido Ibana mardongan unduk dohot ias ni roha. Siala haporseaonni na huliton i, tarlumobi siala holong ni Jesus Kristus, dipamalum Jesus ma Ibana.
Boha hita sudena? Di tingki ro sahit tu hita, hita ingot do Jesus i jala mengido dibagasan haporseaon dohot unduk ni roha asa dipamalum hita marhite angka obat na hita allang? Naeng ma nian hita di tingki marsahit, marobat hita, mangallang ubat jala huhut martangiang tu Jesus asa dipamalum hita marhite angka upayanta laho malum.

Read More

RENUNGAN HARIAN

RENUNGAN HARIAN BAHASA TOBA:

Kamis, 25 Juni 2009 Kej 16: 1-12.15-16 Mat 7: 21-29

“Asa na umbege hatangki jala diulahon, sipatudoson ma i tu halak na marroha, na paulihon bagasna diatas batu mamak.” (Mat 7:24)

Tung mansai malo hian Jesus i manghatai dohot mangajari, lobi sian angka parsinabul na adong di liat portibi on. Tarhalongang sude jolma i manangihon hataNa nagok huaso. HuasoNa ndang alani janji-janji songon angka parpolitik nuang on, alai gok huaso na sian Debata do, jala barani Ibana mandok aha na sintong dohot aha na so sintong.
Asing sian i, Jesus i ndang holan malo manghatai, alai aha nadidokNai, diulahon Ibana do marhite angka pembahenan na denggan jala gok holong tu jolma.
Hita pe diundang mangihuthon jala mangulahon songon naung binahenNa. Unang ma nian hita dok hita halak Kristen, alai holan hata sambing. Unang ma nian hita holan malo manghatai taringot tu hakristenon, malo martangiang, malo marjamita, alai ndang mengulahon holong. Haporseaonta i, ingkon marparbue dinamangulahon ulaon holong tu angka dongan. ido na tutu hita halak Kristen.

Read More